Amed – Hevseroka Komeleya Wêjekarên Kurd Herdem Merwanî têkildarî pêvajoya “Aştî û Civaka Demokratîk” axivî û got: “Azadî û aştî ji bo me weke hibira pênûsê ye. Bangewaziya me ew e ku her nivîskar, hunermend û rewşenbîrên civakê li vê pêvajoyê xwedî derkevin.”
Pêvajoya “Aştî û Civaka Demokratîk” a ku Rêberê Gelê Kurd Abdullah Ocalan di 27ê Sibatê de dabû destpêkirin gelek tişt bi xwe re guhertin û rê li ber gelek tiştan vekir. Pêvajo gihîştiye asteke ku nîqaş li ser çêkirina rêziknameyên qanûnî yên pêwîst dest pê kirine. Di 4ê Çileyê de mitînga “Hêvî û Azadiyê” bi daxwaza azadiya fizîkî ya Rêberê Gelê Kurd Abdullah Ocalan li dar bixe. Di mîtîngê de ku dê li Qada Îstasyonê ya Amedê were lidarxistin. Hevseroka Komeleya Wêjekarên Kurd, Nivîskar Herdem Merwanî têkildarî pêvajoyê de axivî û balê kişand ser mitîngê û got: “Em jî weke Komeleya Wêjekarên Kurd piştgirî didin vê pêvajoyê û em ê jî li qadê bin.”
‘Azadî û aştî û weke nan û avê hewce ne’
Herdem Merwanî anî ziman ku “Pêvajoya Aştî û Civaka Demokratîk” a ku Rêberê Gelê Kurd Abdullah Ocalan daye destpêkirin her tim di rojeva wan de ye û wiha got: “Ev xapandin roj bi roj gelek nakokiyan bi xwe re dide avakirin. Bi vê pêvajoyê re hêviyeke mezin di nav civakê de zindî bû. Êdî em dixwazin gavên şênber bêne avêtin. Azadî û Aştî weke nan û avê hewce ne. Dema ku gavên şênber neyên avêtin dibe ku sedemeke neyînî jî bi xwe re bide avakirin. Ji bo ku ev gumanên di nava civakê hatine avakirin bêne rakirin em li benda gavên şênber in. Gelek caran partiyên siyasî daxuyaniyan didin jî, lê dîsa kêm dimîne. Aştî ne ew e ku di carekê de bê avakirin, helbet bi demê re tê avakirin. Lê divê berbirsyar jî êdî gavên şênber biavêjin. Aştî bi yek alî nayê meşandin, dema ku bi yek alî be, bêhêvîtiyê bi xwe re tîne. Weke nivîskarên Kurd em jî dibêjin hewceye êdî gav bêne avêtin. Jixwe em dizanin ku aştiya şerekî 50 sal in tê domandin ne hêsan e.”
‘Ev pêvajo gelek pîroz e, dibe ku careke din ev firsend nekeve destê me’
Herdem Merwanî bal kişand ser şert û mercên ku li Kurdistan û Rojhilata Navîn û diyar kir ku ev şert û mercên heyî civatê têr bike û hêvî bide. Herdem Merwanî destnîşan kir ku divê her kes bi awayekî zêde xwedî li pêvajoyê derkeve û wiha domand: “Ya din jî di 4ê Çileyê de li Qada Îstasyonê mitînga azadiya fîzîkî ya Rêberê Gelê Kurd Abdullah Ocalan, dê were lidarxistin. Em jî weke Komeleya Wêjekarên Kurd piştgirî didin vê pêvajoyê û em jî dê li qadê bin. Azadî û aştî ji bo me weke hibira pênûsê ye. Bangewaziya me ew e ku her nivîskar, hunermend û rewşenbîrên civakê li vê pêvajoyê xwedî derkevin. Dema ku fikir û raman ne azad bin, bi mirarî bin mirov nikare bikeve xizmeta civaka xwe û ya xwe ya şexsî. Ji bo careke dinê canê kesekî neêşê divê em li pêvajoyê xwedî derkevin. Ev pêvajo gelek pîroz e, dibe ku careke din ev firsend nekeve destê me. Niha êdî barê giran ketiye ser milê dewletê ku êdî gavên şênber biavêje, êdî civak vêya dixwaze. Her du aliyan jî gelek bedel dane û xesarên mezin dîtine û êşên mezin kişandine. Rêberê Gelê Kurd birêz Abdullah Ocalan gavên şênber û wêrek avêtiye. Di cihekî weke Rojhilata Navîn de her kesî şer diaxivî îro Kurd aştiyê diaxivin. Ev jî bi saya Rêberê Gelê Kurd e.”
