Meşa ji Amedê ber bi Amarayê ve bi dirûşma “Bijî Serok Apo” dest pê kir. Ciwan ji gundê Pîrîncîkê heta demekê meşiyan û piştre bi maşîneyan ber bi Sîweregerê ketin rê.
Meclisa Ciwanan a Partiya Wekhevî û Demokrasiyê ya Gelan (DEM Partî), bi boneya sala 76emîn a rojbûna Rêberê Gelê Kurd Abdullah Ocalan, ji Amedê ber bi gundê Amarayê yê navçeya Xelfetî ya Rihayê ve meşê li dar dixe. Ciwanan li Qada Şêx Seîd a Amedê dest bi meşê kirin û ketin rêya Amarayê. Ciwan, bi dirûşma “Bi civaka demokratîk em ber bi azadiyê ve dimeşin” ketin rê û dê heta 4ê Nîsanê li gundê Amarayê meşa xwe bi dawî bikin.
Ciwanan beriya meşê, li Qada Şêx Seîd a Amedê daxuyanî dan. Parlamenterên DEM Partiyê Bêrîtan Guneş û Onur Duşunmez, aktîvîstên Tevgera Jinên Azad (TJA), endamên Meclisa Dayikên Aştiyê û nûnerên gelek saziyên civaka sivîl ên bajar jî beşdar bûn. Ciwan piştî daxuyaniyê ketin rêya Amarayê. Ciwanan pêşmalkên “Em ber bi azadiyê ve dimeşin” li xwe kirin û ji nokteya kontrolê ya Pîrîncîkê ya Amedê heta demekê meşiyan û piştre bi maşîneyan ketin rêyae Sîweregê. Ciwan dê ji Sîweregê bimeşin Curnê Reş û ji wir jî bimeşin Riha, Xalfetî û dê meşê li Gundê Amarayê bi dawî bikin. Meşa ciwanan ber bi Sîweregê ve didome.
