Nûnerên KESKê di 13yê Cotmehê de li Amedê dest bi meşê kiribûn. Meş di roja pêncemîn de li Enqereyê bi dawî bû. Hevsokê Giştî yê KESKê Ahmet Karagoz diyar kir ku ev ne dawî ye, berxwedana wan a vegerandina kar û aştiyê dê berdewam bike.
Konfederasyona Sendîkaya Kedkarên Cemaweriyê (KESK), li dijî dûrxistina endamên xwe ku bi KHKiyan ji kar hatin derxistin, bi dirûşma “Em ê karê xwe bi paş ve bistînin” di 13ê Cotmehê de ji Amedê ber bi Enqereyê ve dest bi meşê kiribû. Endamên KESKê di roja 4emîn a meşê de duh gihîştin Enqereyê. Di roja pêncemîn de endamên KESKê ku xwestin bimeşin ber Meclîsê ji hêla polîsan ve hatin astengkirin. Girse nêzî deriyê Çankaya yê Meclîsê daxuyanî da. Piştî daxuyaniyê girse pêşiya Bîrdara Madenciyê dest bi çalakiyê kir. Bi dirûşmayên “Bijî berxwedana karkeran” û “Dê KHKê herin em ê bimînin” berz kirin bertek nîşanî astengiya polîsan dan û li vir dest bi çalakiya rûniştinê kirin. Meşvan heta seat 17.00an li vir man û paşê daxuyanî dan.
‘Me li ber xwe da, em ê li ber xwe bidin’
Li wir ewilî Hevserokê Giştî yê KESKê Ahmet Karagoz axivî û diyar kir ku KESK rêxistnekî aştiyane ye, ew ji bo aştiyê jî meşiyane û got: “1300 hevalên me piştî ji kar hatin derxistin jiyana xwe dest dan. 130 jî xwekuşt. Em bi keda xwe hatin li ser kar. Lê me ji kar avêtin. Mafê parastinê hat binpêkirin. Desthilatdar xwest me bînê wê astê ku em nekarin debara xwe pêk bînin. Lê em bi alîkariya hevrêyên xwe ser piyan sekinîn. Me li ber xwe da, em ê li ber xwe bidin. Îro ne dawiyê, heta ku em vegerin li ser karê xwe, aştî were vî welatî em ê li ber xwe bidin. Em ê dîsa werin. Em çûn Meclîsê me hevdîtin pêk anî, DEM Partî û partiyên din gotin ku ew ê her dem piştgiriya me bikin.”
Meş û daxuyanî bi dirûşma “Bijî berxwedana karkeran” dawî bû.
