Serokê PDKê Mesûd Barzanî têkildarî êrîşên çekdarên hikûmeta demkî ya Şamê li ser taxên kurdan Şêxmeqsûd û Eşrefiyeyê yên li Helebê got, “Li wê deverê gefa paqijiya nijadî li dijî Kurdan heye.”
Serokê PDKê Mesûd Barzanî têkildarî têkildarî êrişên çekdarên hikûmeta demkî ya Şamê li ser taxên Kurdan Şêxmeqsûd û Eşrefiyeyê yên li Helebê peyamek belav kir û hişyarî da ku “li wê deverê gefa paqijiya nijadî li dijî Kurdan heye.”
Mesûd Barzanî bangî desthilatdarên Sûriyeyê û Hêzên Sûriyeya Demokratîk (HSD) kir ku rêya diyalogê hilbijêrin û rê li ber xwînrijandinê bigirin.
Barzanî diyar kir ku guherînên siyasî yên li Sûriyeyê derfeteke baş bû ji bo çareserkirina pirsgirêkan lê rewşa niha ya Helebê cihê fikarên mezine.
Her wisa Barzanî di peyama xwe de bal kişand ser metirsiya li ser xelkê sivîl û got: “Ew rewşa metirsîdar û ew şer û tundiya ku niha li bajarê Helebê heye, cihê dilgiraniyekê zêde ye. Metirsî li ser jiyana xelkê sivîl û welatiyên bêguneh çêkiriye û gefa paqijiya nijadî li dijî Kurdan li wê deverê heye.”
Mesûd Barzanî ji desthilatdarên Sûriyeyê xwest ku pirsgirêkên siyasî veneguherînin şerê netewî û wiha got: “Ez daxwazê ji desthilatdarên Sûriyeyê dikim ku pirsgirêkên siyasî nekin pirsgirêka netewî. Di wan pirsgirêk û aloziyên li herêma Helebê de hene, divê rê neyê dayîn welatiyên kurd bi zext û zordariyê rûbirû bimînin û ji cihê bav û kalên xwe werin derxistin û rûbirûyê paqijiya nijadî bibin.”
Barzanî her wiha bangî aliyên kurd û HSDê jî kir û got: “Daxwazê ji aliyên Kurdan û bi taybetî HSDê dikim, ji bo rawestandina şer, pevçûnan û rêgirtina li xwînrijandina zêdetir tiştê ji destê wan tê bikin.”
Di dawiya peyama xwe de Serokê PDKê Mesûd Barzanî tekez kir ku divê her du alî rêya diyalogê hilbijêrin û wiha got; “Nabe hebûna pirsgirêkên siyasî bibe sedema wê yekê ku jiyana xelkê sivîl bikeve bin metirsiyê û paqijiya nijadî li dijî gelê Kurd rû bide. Ev tawana li dijî mirovahiyê ye û dê encamên metirsîdar jê derkevin.”
