Amed – Hunermend Mîr Perwer, Evîn Goyî û Abdurrahman Kizil di salvegera 3emîn a kuştina xwe de tên bibîranîn. Hevalê Mîr Perwer, Ferhat Demîrellî di salvegera kuştina hevalê xwe de got: “Heval Mîr Perwer êşên welatê xwe bi stranên xwe digot.”
Di 23yê Kanûna sala 2022yan de kujerel li Navenda Çanda Kurdî ya Ahmet Kaya ya li paytexta Fransayê Parîsê êrişek hovane pêk anî. Di encama vê êrişa hovane de stranbêj Mîr Perwer, endama Konseya Rêveberiya KCKê Emîne Kara (Evîn Goyî) û welatparêzê Kurd Abdurrahman Kizil jîyana xwe ji dest dan. Bi rasthatina salvegera sêyemîn a vê komkujiya hovane dê her sê qurbanî werin bibîranîn.
Hevalê Mîr Perwer, Ferhat Demîrellî derheqê jiyana hevalê xwe de axivî.
‘Pirr ji Hozan Serhat hez dikir’
Ferhat Demîrellî anî ziman ku dema ew li zanîngehê xwendekar bû Mîr Perwer nas kiriye û û got: “Heval Mîr Perwer hembajariyê min bû. Ji bo daweta dihate gundê me. Min li Êlihê zanîngeh xwend, ew jî ji bo xebatên stranbêjiyê dihat Êlihê û em di malekê de diman. Me wisa bi nêzîkî hev nas kir. Piştî wê demê jixwe çû derve. Ez ji bo Mîr Perwer dibêjim Hozan Serhedê duyemîn e. Jixwe pirr ji Hozan Serhed hez dikir û stranê wî şîrove dikir. Hunermendekî welatparêz bû, ji welatê xwe pirr hez dikir. Heval Mîr Perwer êşên welatê xwe di stranên xwe de digot. Hunera wî ji bo civakê bû.”
‘Girêdayî welatê xwe bû lewma bû armanc’
Ferhat Demîrellî da zanîn ku herî dawiyê li Stenbolê hevalê xwe Mîr Perwer dîtiye û wiha got: “Di dawiyê de me li Stenbolê hev dît. Carekê çû Yewnanistanê hate girtin. Piştre jî derket çû Ewropayê. Dema ku çû jî pirr hestiyar û bi hêrs bû. Ji dayika xwe, ji hevalê xwe dûr ket. Heke tu kurdekî welatparêz bî û girêdayî nirxê xwe bî dibî armanc. Dema heval Mîr Perwer şehîd ket, min bawer nekir, her çiqas heval li min geriyan jî lê bi zorê qanih bûm. Ez pir hestiyar bûm û ez matmayî mam.”
‘Divê em xwedî li hunera Mîr Perwer derkevin’
Ferhat Demîrellî diyar kir ku dema ku cenazeyê Mîr Perwer hate Mûşê dewletê gelek astengî derxistibû û êrişî merasîma cenaze kir û wiha got: “Di wan salan de yek ji girseya herî qelebalix hatibû Mûşê. Dewletê cenazeyê Mîr Perwer ji girseyê revand. Revandin û mudaxileya li dijî cenaze li dijî mafên mirovan bû û rêz ji baweriyê re jî nehat girtin. Di merasîma cenaze de jî êrişa duyemîn li dijî Mîr Perwer hate kirin. Ya yekemîn wî ji welatê wî dûr xistin. Pir dilê wî diêşiya ku çû derveyî welat. Bi telefonê li min digeriya digot, ‘min bêriya welat, hevalê xwe, dayika xwe, bêriya zarokên xwe kiriye’. Nehiştin em em cenazeyê wî jî bibînin. Divê em bi her awayî xwedî li hunera Mîr Perwer û hunermendên xwe şehîd derkevin.”
