Amed – Seroka Giştî ya MKGê Roza Metîna têkildarî gefên li ser rojnamegerên jin daxuyanî da û got: “Armanc bêdengkirina lêgerîna jinan a ji bo rastiyê ye. Em ê kevneşopiya Çapemeniya Azad diparêzin.”
Komeleya Rojnamegerên Jin a Mezopotamyayê (MGK) li dijî êrişên ser jinên rojnameger û gefxwarinan bi dirûşma “Rojnamegerî Ne Suce”, “Çapemeniya Azad Nayê Bêdengkirin” li pêşiya avahiya komeleyê ya li Navçeya Bajarê Nu ya Amedê daxuyanî da. Komeleya Rojnamegeran a Dîcle Firatê (DFG), Komeleya Jinan a Rosayê, Platforma Jinan a Dîcle Firatê, Baroya Amedê, rojnameger jin û nunerên saziyên sivîl beşdarî daxuyaniyê bûn. Kurmanciya metna daxuyaniyê ji hêla Seroka Giştî ya MKGê Roza Metinayê Tirkiya wê jî ji hêla Semra Turanê ve hate xwendin.
‘Çapemeniya azad bîra kolektîf ava dike’
Seroka MKGê Roza Metîna destnîşan kir ku li dijî erîşan ew ê bêdeng nemînin û wiha got: “Kevneşopiya Çapemeniya Azad cureyeke rojnamegeriyê ye. Kevneşopiya Çapemeniya Azad mafê raya giştî yê, mafê agahdarkirinê diparêze û rastiyê bi perspektîfa civakê radigihîne ne bi perspektîfa desthilatê.”
Roza metîna da zanîn ku rojnamevanên jin, wekî hêmanên herî dînamîk ên vê kevneşopiyê ne û wiha berdewam kir: “Tenê rastiyê eşkere dikin lê di heman demê de mafê jiyanê yên jin û zarokan jî diparêzin. Îro, gef, lêpirsîn û dozên ku rojnamevanên jin hedef digirin vê kevneşopiyê hedef digirin. Em wek MKG dizanin ev êrîş ne tesadufî ne. Armanca wan bêdengkirina lêgerîna jinan a ji bo rastiyê û Çapemeniya Azad e. Çapemeniya Azad jî bîra kolektîf ava dike. Lê em li vir diyar dikin, ne gef û ne jî doz dê vê îradeyê nikaribe bişkîne.”
‘Gef tên xwarin’
Roza Metîna di berfirehiya axaftina xwe de bilêv kir ku gefa kuştinê li nûçegihana JINNEWSê Şehrîban Aslan hatiye xwarin û derbarê mijarê de ev tişt anî ziman: “Piştî nûçeya bi sernavê ‘Malbata ku zarokên wan hatine revandin: Ewlekariya me ya jiyanê tune ye’ wêneyên Şehrîban Aslanê, ji aliyê bersûcê bi navê Zulfî Şakar ê navê wî di nûçeyê derbas dibû, hate belevkirin. Zulfî Şakar di heman demê de gefa kuştinê li Şehrîban Aslan xwaribû. Bi gotina ‘Ez ê serê wê ji laşê wê bikim, ez dizanim ajans li ku ye’ gef li Şehrîban Aslanê hat xwarin.”
‘Bêcezahiştin gefxwarinê zêde dikin’
Roza Metîna da zanîn ku Şehrîban Aslan, li gel parêzerê xwe giliya bersûc kiriye û gotinên xwe wiha domandin: “Tevî vê yekê jî, heta niha li dijî sûcdar ti tevdîrên bi bandor nehatine girtin. Siyaseta bêcehiştinê dibe sedema zêdebûna êrîşên li dijî rojnamegeran.”
‘Êrîşên li dijî rojnamegerên jin bê ceza nemînin’
Roza Metîna diyar kir ku nûçegîhana JINNEWSê Oznur Deger tekoşîna xwe ya hiqûqî ya ku ji ber gefê lê hatibû xwarin berneda û wiha got: “Rojnameger Oznûr Deger piştî weşandina nûçeya bi sernavê ‘Çeteya şantajê ya li Wanê: Ozcan Pûlat kî ye? gefê lê hate xwarin û şantaj hate kirin. Dozgeriyê ji ber gefên li dijî jinan doz li bersûc vekir. Oznûr Deger tawîzê nade û têkoşîna xwe ya zagonî didomîne da ku êrîşên li dijî rojnamegerên jin bê ceza nemînin.”
‘Kevneşopiya Çapemeniya Azad didome’
Seroka MKGê Roza Metîna bal kişand ser gef xwarina li dijî nûçegihana MAyê Zeynep Dûrgûtê û ev tişt got: “Ji ber nûçeya xwe ya li ser şebekeyeke fihûşê ya li Şirnexê ya di sala 2013an de bi tohmeta belavkirina agahiyên şaş, ji bo îfadeyê, gazî wê kirin. Zeynep Dûrgût diyar kir ku wê nûçeya xwe li ser îdianameya fermî ava kiriye û hem xebata xwe ya rojnamegeriyê û hem jî mafê raya giştî yê zanîna rastiyê parast. Di vê heyamê de, ji aliyê şebekeyê ve gef lê hat xwarin û Zeynep Dûrgûtê sûcdar û xizmên wî gilî kir. Rojnamegeriya ku ji hêla van hersê rojnamevanên jin ve tê kirin ne tenê ragihandina nûçeyan e, lê di heman demê de şahidiya rastiyên civakî dike, daxwaza edaletê bilind dike û kevneşopiya Çapemeniya Azad didomîne. Çapemeniya azad wijdanê gel e, ne yê îktidaran e. Rojnamevan dengê vî wijdanî ne. Her êrîşek li dijî wan, êrîşek li ser mafê gel ê agahdarkirinê ye. Em, rojnamevan, li hember van êrîşan bêdeng namînin; em ê berdewam bikin ku rastiyê binivîsin, rastiyê biparêzin û bîra civakî ava bikin.”
‘Rojnamegeriya jinan nayê tunekirin!’
Roza Metîna di dawiya daxuyaniya de ew doz, gef û lêpirsînên derbarê rojnamegeran de dişopînin û gotinên xwe wiha bi dawî kir: “Em ê ji bo bidawîkirina siyaseta bêcezatiyê û bidawîkirina krîmînalîzekirina rojnamegeriyê têbikoşin. Em bang li raya giştî, rêxistinên jinan, rêxistinên pîşeyî yên çapemeniyê û rêxistinên demokratîk dikin ku hevgirtina xwe zêde bikin. Em dubare dikin, kevneşopiya me ya çapemeniya azad nayê bêdengkirin û rojnamegeriya jinan nayê tunekirin!”
