Amed – Dayîka Aştiyê Nezahat Teke ku tev li merasîma şewitandina çekan a “Koma Aştî û Civaka Demokratîk” a li Silêmaniyê bû destnîşan kir ku ji bo dayikan diyariya herî mezin aştî ye û wiha got: “Em êdî şer naxwazin. Aştî şahî ye, dilgeşî ye, sekinîna hesrên çavên dayikan e.”
Rêberê Gelê Kurd Abdullah Ocalan di 9ê Tîrmehê de di çarçoveya “Pêvajoya Aştî û Civaka Demokratîk” de bangeke nû ya dîrokî kir. Li ser vê yekê Koma “Aştî û Civaka Demokratîk” a ji 30 endamên PKKê pêk dihat di 11ê Tîrmehê de li Şikefta Caseneyê ya li bajarê Silêmaniyê merasîma şewitandina çekan li dar xist. Ji bakurê Kurdistan û Tirkiyeyê jî gelek siyasetmedar, rewşenbîr, nivîskar, Dayikên Aştiyê û rojnameger tev li merasîmê bûn. Yek ji van jî Dayika Aştiyê Nezahat Teke bû.
Nezahat Teke bal kişand ser banga Rêberê Gelê Kurd a di 27ê Sibatê de ji rayagiştî re parve kir û wiha got: “Piştî vê bangê hênkahiyek di dilê me de çêbû. Ji ber bi salan e li vî welatî mirov tên kuştinê, dayik digirîn, gund şewitîn… Pişt re li ser banga Rêberê Gelê Kurd PKKê xwe fesix kir, agirbest îlan kir û çek şewitandin. Aştî bi yek alî çênabe.”
‘Em gaveke din ber bi aştiyê ve çûn’
Nezahat Teke bal kişand ser merasîma şewitandina çekan a “Koma Aştî û Civaka Demokratîk” a PKKê û wiha domand: “Şandeya ku hatiye wê derê herkes di nav de hebû. Ez li ser navê Dayikên Aştiyê ji Amedê çûm. Zor û zehmetiyên wê hebûn. Lê dema mesele aştî be ne êş û nexweşiyên me tên bîra me ne êşa canê me tê bîra me. Em dibêjin bila aştî were vî welatî mirov nemirin bes e. Gava ku gerîla ji şikeftê hatin xwarê û pêşengtî jî jinekê dikir em hem xemgîn bûn hem keyfxweş bûn. Em gaveke din ber bi aştiyê ve çûn. Baweriya me xurttir bû. Çek hatin şewitandin. Dema çavên me bi çekan dikevin mirin tê bîra me. Heke ev hatibin şewitandin hêviyeke mezin dide mirov. Em bi hêviyeke geş ji wir vegeriyan hatin. Gelek mirov li wir bûn hema bêje herkes girî ya. Ev girîn jî ne ya xemgîniyê bû giriya keyfxweşiyê bû. Dilê me bitirse. Lazim e dewlet gaveke girîng biavêje.”
‘Rêberê Gelê Kurd mîmartiya aştiyê dike’
Nezahat Teke destnîşan kir ku heke pêvajoyek dest pê kiribe divê ewilî deriyên Îmraliyê bên vekirin û wiha domand: “Rêberê Gelê Kurd pêşengtiyê û mîmartiya aştiyê dike. Ji bo ku ew bikare kar û xebatên xwe bi cih bîne divê derfet bên avakirin. Kar û xebatên aştiyê gelekî giran in. Dinyayê jî dît ku banga ew bike li erdê namîne. Em dixwazin qanûnan çêbikin girtiyên hefs û zindanan bên berdanê. Komîsyona ku li Meclisê bê çêkirin divê destê xwe deyne ser wijdana xwe. Bi dilekî rehet îro çareseriyek were çêkirin. Ji bo me niha deqîqe û saet mûhîm in. Divê dewlet gavekê biavêje. Dibe ku hinek li hember jî derkevin. Em ne li pey tolhildanê ne. Em dayikên Kurdan tu car nabêjin min sê-çar zarokên xwe dan çima çêdikin. Em dayikên aştiyê her tim dibêjin em bedenên ciwanan binerd nekin em çekan binerd bikin.”
‘Aştiyê diyarî dayikan bikin’
Nezahat Teke bang li saziyên sivîl û partiyên siyasî kir û ev tişt got: “Lazime herkes îro karê xwe bike. Dem ne dema rûniştinê ye. Em nikarin 50 salên din dilê dayika bişewite. Me ev bare daye ser milê xwe ji bo ku dayik negirîn. Ji bo me diyarî û xelata herî mezin ew e ku cenaze bi ser dayikan de neyên û aştî pêk were. Aştiyê diyarî dayikan bikin.”
‘Em bang li dewletê dikin hûn li benda çi sekinîne’
Nezahat Teke bal kişand ser şewitandina çekan û axaftina xwe wiha bi dawî kir: “Heke çek were şewitandin demek tê xwestin ku dawî li şer were, demokrasî pêk were. Heke were şewitandin ew çek êdî nayê rakirinê. Dixwazin di nava siyaseteke demokratîk de kar û xebatên xwe bikin. Divê dewlet jî pêşiya van veke. Em êdî şer naxwazin. Aştî şahî ye, dilgeşî ye, sekinîna hesrên çavên dayikan e. Em dewletê re bang dikin dora we ye hûn li benda çi sekinîne. Em dixwazin em jî tev li vê pêvajoyê bibin. Em dixwazin biçin aliyê Behrareş, Tirkiyeyê bi dayîkên leşkeran re biaxivin. Em bêjin em jî weke we ne. Em cardin bang li wan dikin dayikno werin em destê xwe bidin hev. Me zarokên xwe winda kir bila hin kesên din nekin. ”
