Orhan Dogan di 18emîn salvegera wefata xwe de li Cizîrê hat bîranîn.
Orhan Dogan di 18emîn salvegera wefata xwe de bi tevlîbûna parlamenterên DEM Partiyê Zekî Îrmez û Ayşegul Dogan, rêveberên DEM Partî û DBPê yên Şirnex û navçeyên wê, hevşaredarên Deştadarê û Hezex, endamên TJA, TUHAD-DER, DÎSK, KESK, Baroya Şirnexê, ÎHD, dayikên aştiyê li ser gora xwe hat bîranîn.
Di destpêka bîranînê de mewlûd hate xwendin û piştî xwendina mewlûdê Hevserokê DEM Partiyê yê Şirnex Ramazan Ûysal axivî. Ûysal da zanin ku Dogan di her kêliya jiyana xwe de ji bo aştî, demokrasi, mafên gelê Kurd têkoşîn daye û ew ê her tim Dogan bi bîr bînin.
Parlementerê DEM Partiyê yê Şirnexê Zekî Îrmez bi lêv kir ku hizrê Dogan her tim li ser aştiyê bû û wiha berdewam kir; “Orhan Dogan ji bo aştiyê digot ‘qalkirina aştiyê erê, fikra aştiyê erê lê ya herî girîng ew e ku mirov kedê bide aştiyê, ji bo aştiyê têkoşînê bide’. Piştî ku Orhan Dogan ji girtîgehê derket ji bo aştiyê xebata xwe berdewam kir û dema ji bo aştiyê xebat dikir jiyana xwe ji dest da.”
Îrmez anî ziman ku weke şopdarên wî ew ê her tim li pey doza Orhan Dogan bimeşin.
Berdevka DEM Partiyê û keça Orhan Dogan, Ayşegul Dogan jî got ku beriya niha 18 salan wan weke malbat ji bavê xwe re gotiye ew minetdarê wî ne û wiha pêde çû; “Bavê min malbatek gelek mezin ji me re hela, kedek gelek mezin ji me re hişt û ji ber vê yekê minetdarê bavê xwe ne. Weke partî ev 18 sal in çi ji deste rêxistinê hatibe ji bo aştiyê ango daxwaza bavê min pêk anî.”
Dogan serî dawî got ku bavê wê û hevalên bavê wê yên dozê paşeroja wan in û heya paşeroj neyê fêmkirin mirov bikare pêşeroja xwe jî ava bike.
Piştî axaftinan dayikên aştiyê gul danîn ser gora Dogan û merasîm bi dawî bû.
