Şandeya Îmraliyê ya DEM Partiyê bi serokê MHPê Devlet Bahçelî re civiya. Piştî hevdîtinê endamên şandeyê daxuyanî da. Li ser navê Şandeyê Pervîn Buldan got: “Pêdivî bi danûstandinê û bi helwesteke hevpar heye.”
Endamên Şandeya Îmraliyê ya Partiya Wekhevî û Demokrasiyê ya Gelan (DEM Partî) Pervîn Bûldan, Mithat Sancar û Ozgur Erol, li meclisê bi Serokê Giştî yê MHPê re Devlet Bahçelî re hevdîtin kir. Piştî hevdîtinê daxuyanî dan.
Endama şandeyê Pervîn Bûldan diyar kir ku têkildarî pêvajoyê danûstandin kirine û got: “Me careke din nêrînên erênî û pozîtîf ên der barê pêvajoyê de yên birêz Bahçelî guhdar kirin. Ez dixwazim bêjim ku piştî vê pêvajoyê dê dem bi dem hevdîtinên me hem bi birêz Bahçelî hem bi partiyên muxalefetê û hem jî bi pêkhateyên Tifaqa Cumhûrê re bidomin. Di dema komîsyonê de jî pêdiviya me bi hev heye. Pêdivî bi danûstandinê heye. Pêdiviya me bi helwesteke hevpar heye. Em ê di her qonaxê de hem birêz Bahçelî hem jî serokên giştî yên partiyên din agahdar bikin. Ji bo ev pêvajo di demeke herî nêz de veguhere pêvajoya aştiyê em ê bi her awayî piştgiriyê bidin û têbikoşin.”
