Wan – Şaxa Egîtîm Senê ya Wanê Pêşbirka Çîrokên Jinan a Rojîn Kabaîş da destpêkirin. Endama Egîtîm Senê Olcay Çomleklî Yurdakul diyar kir ku armanca wan ew e ku balê bikişînin ser kuştina jinan û got: “Hevî û înada me ew e ku ji bo cîhanek û welatekî ku êdî jin lê neyên qetilkirin.”
Li Zanîngeha Yuzuncu Yilê ya Wanê dî 27ê Îlona 2024an de xwendakara beşa mamostetiy3e Rojîn Kabaîş winda bû. Piştî 18 rojan cenazeyê Rojîn Kabaîş li qeraxa Behra Wanê hate dîtin. Ji bo Rojîn Kabaîş li Kurdistanê û gelek bajarên Tirkiyê sazî û welatiyan çalakî li dar xistin û bertek nîşanî neronîkirina bûyerê dan. Şaxa Sendîkaya Egîtîm Senê ya Wanê ji bo balê bikişîne ser kuştina Rojîn Kabaîş û tevahî jinan, li Wanê di navbera 31ê Çileyê û 14ê Adara 2026an de “Pêşbirka Çirokên Jinan a Rojîn Kabaîş” li dar bixe. Serlêdana dest pê kiriye, dê serlêdan di 31ê Çile de bi dawî bibe. Ji 31ê Çile şûn ve jî çîrokên ku biçin ber destê jûriyê dê bên nirxandin û di 14ê Adarê de encam were eşkerekirin.
‘Em dixwazin bi rêya wêjeyê di rojevê de bihêlin’
Endama Şaxa Egîtîm Senê ya Wanê Olcay Çomleklî Yurdakul derbarê Pêşbirka Çîrokên Jinan a Rojîn Kabaîş de bi bîr xist ku Rojîn Kabaîş di 27ê Îlona 2024an de li Zanîngeha Wanê winda bû û 15ê Cotmehê jî cihê ku lê windabûyî gelekî dûr hat dîtin. Olcay Çomleklî Yurdakul bal kişand ser mirina biguman a Rojînê û got: “Destpêkê gotin xwe kuştiye, lê malbata wê ev yek qebûl nekir û têkoşîna edaletê dan. Em jî di xwazin piştgiriyê bidine têkoşîna malbata Rojîn Kabaîşê. Em di xwazin bi rêya wêjeyê Rojîn Kabaîş û hemû jinên hatine qetilkirin di rojevê de bihêlin.”
‘Armanca me ew e ku her sal bê kirin’
Olcay Çomleklî Yurdakul diyar kir ku şaxa Egîtîm Sena Wanê heya niha li ser navê jinan tiştekî bi vî awayî li dar nexistiye û got: “Li ser navê Musa Anter ku di têkoşîna aştiyê de gelekî girîng e, me pêşbirkên futbol û voleybolê pêk anîne. Ev yekemîn pêşbirk e ku li ser navê jinan tê kirin. Daxwaza me ew e ku ev Pêşbirka Çîrokên Jinan a Rojîn Kabaîşê her sal bê kirin.”
‘Mirineke biguman e’
Olcay Çomlekli Yurdakul diyar kir ku li gel malbata Rojîn Kabaîşê ketine nava danûstandinê û ji wan destûr xwastin e ku li ser navê Rojînê ji bo jinan pêşbirkeke wiha pêk binîn û ev yek anîn ziman: “Malbat jî bi vê yekê gelek kêfxweş bû. Tê zanîn ku di erdnigarîya me de dayik bêtir li ser keçên xwe hişyar in, lê ya Rojîn Kabaîşê herî zêde bavê wê gelek li ber xwe da û bi têkoşîna xwe ya edaletê gelek di rojevê de cih girt. Mirina Rojîn Kabaîşê mirineke bi guman bû. Ji bo têkoşîna edaletê ya malbata wê û ya tevahî civakê me jî xwest bi rêya wejeyê vê tekoşînê mezin bikin.”
Wê serlêdan du zimanî be
Olcay Çomleklî Yurdakul derbarê amadekirina pêşbirkê de ev agahî dan: “Me di xwast ku jûrîya me tevahî jin be û me ev pêk anî. Ya din jî me dixwest encamên pêşbirkê ji ber ku rojbûna Rojînê ye, di 20ê Adarê de eşkere bikin, lê ji ber ku di 20ê Adarê de Cejna Remezanê û Cejna Newrozê heye me dîroka encaman paşde da û kir 14ê Adarê. Lê dibe ku di salên bê de em di rojbûna wê de vê tiştê bikin. Mijara pêşbirkê jin e. Kesên ku ji 18 saliyê mezintir in dikarin bi çîrokên xwe serî lê bidin. Bi zaraveyê Kurmancî û Kirmanckî/Zazakî û bi Tirkî dikarin serlêdanê bikin. Pêşbaz dê heta 31ê Çileya 2026an bi rêya e-postayê bişînin. Di 14ê Adara 2026an de encamên pêşbirkê dê eşkere bin û bi raya giştî re bê parvekirin.”
‘Em dixwazin herî zêde serlêdan bi Kurdî be’
Olcay Çomleklî Yurdakul axaftina xwe wiha bi dawî kir: “Hêvîya me ew ku herî zêde çîrokên bi zaraveyên Kurmancî/Kirmanckî bê nivîsîn. Em beşdarbûneke xurt hêvî dikin. Hevî û înada me cîhanek û welateke ku êdî jin lê neyên qetilkirin e.”
