Gel li Şirnexê piştî qedexeyên derketina derve, cara yekemîn bi şahiyekê Newroz pîroz kir.
Komîteya Amedakar a Newroza Şirnexê piştî qedexeyên derketina derve cara yekemîn di seatên evarê de ji bo pîrozbahiya Newrozê şahiyek li dar xist. Gel şahiya Newrozê li taxa Gemo ya navenda Şirnexê li dar xist. Hevberdevka DEM Partî Ayşegul Dogan, endamên DBP û DEM Partî ên Şirnexê û gelek kes tev li şahiyê bûn. Girseyê di pîrozbahiyê de fîşekên hewayî teqandin û li dora agir gerand gerandin. Berdevka DEM Partî Ayşegul Dogan ku li vir axivî Newroza welatiyan pîrozkir û got: “Ciwanên pêşerojê têgihiştine û dibêjin me banga Rêzdar Abdullah Ocalan bihistiyê û piştgiriyê dikin. Gelê me dibêje em bi girtin û kuştinê xilas nabin. Divê Enqere dengê me bibihîse. Di erdnegeriya me de mal tune ye ku êş nekişandine. Lê dîsa jî em li ber xwe didin. Berxwedana me ji bo aştî û wekheviyê ye. Em nasnameya kesan înkar nakin. Lê divê tu kes jî nasnameya me înkar neke. Piştî salan em coşa Newrozê li vir pîroz dikin. Lê li aliyê din jî em di xemgîniyê de ne. Li Kobanê komkujî kirin. Malbatek tev kuştin. Bi kuştinê ew pirsgirêk çareser nabe. Rêzdar Ocalan rûpelek nû vekir. Ew rûpel dîrokî ye. Divê hûn bawer bin û xwedî derbikevin. Ew rûpela nû wê bi gel re bê nivîsandin.”
Girseyê bê navber dirûşma “Bijî Serok Apo” û “Jin jiyan azadî” berz kir.
Piştî axaftinê jin bi meşeleyan meşiyan û derdora agirê hatibû pêxistin geriyan. Di şahiyê de girsê bê navber dirûşmeyên, “Newroz pîroz be” berzkirin.
Koma Sîdar li ser dîkê stran gotin. Girsê jî li ber stranan govend gerandin.
