Platforma Ked û Demokrasiyê li Îzmîrê der barê êrîşên li ser taxên Şêxmeqsûd û Eşrefiyê yên Helebê daxuyanî da û diyar kir ku gel ne alîgirê pevçûnan e û xwest ku demildest dawî li pevçûnan were.
Platforma Ked û Demokrasiyê ya Îzmîrê ji ber deriyê avahiya OSYMyê heta ber bi Navenda Çandê ya Turkan Saylanê meşek li dar xist û dawiya meşê de daxuyaniyek da. Di meşê de girse bi dirûşmên ‘YPG dimeşe, erd û ezman diheje’ û ‘Bijî berxwedana Rojava’ berz kirin. Daxuyanî li ser navê platformê ji aliyê Nîhat Fîlîz ve hate xwendin.
Nîhat Fîlîz li ser agahiyên ji herêmê tên axivî û got: “Divê mafê jiyanê ya sivîlan teqez were misogerkirin û sivîl ji rewşa şer werine rizgarkirin. Peywira yekem a din jî divê bi awayeke mayînde dawî li şer û pevçûnan were anîn. Em wekî rêxistinên demokratîk ên ji bo ked, demokrasî û aştiyê têdikoşin. Em wekî parêzvanên aştiyê li hember şer, ji bo ku mafê jiyanê yê gelê sivîl neyê binpêkirin, bangî hemû dinyayê dikin: Gelê sivîl ne alîgirê pevçûnan e! Divê ev pevçûn bi lez bêne rawestandin.”
Çalakî bi çepik û berzkirina dirûşmeyan bi dawî bû.
