Platforma Ked û Demokrasiyê ya Amedê li Qada Şêx Seîd daxuyanî da û komkujî şermezar kir.
Platforma Ked û Demokrasiyê ya Amedê bi minasebeta 37emîn salvegera komkujiya Helebceyê li Qada Şêx Seîd a Amedê daxuyanî da. Hevseroka DBPê ya Amedê Sûltan Yaray, Hevseroka DEM Partiyê ya Amedê Gulşen Ozer rêveberên DBP û DEM Partiyê û gelek welatî beşdarî daxuyaniyê bûn. Komê di daxuyaniyê de pankarta “Helebce Nayê Jibîrkirin” vekirin. Beriya daxuyaniyê bidin ji bo kesên di komkujiyê de hatin kuştin deqîqeyekê rêz girtin. Piştî rêzgirtinê Berdevkê Platforma Ked û Demokrasiyê ya Amedê Mehmet Oktay daxuyanî xwend. Mehmet Oktay, anî ziman ku êrîşa kîmyayî weke binpêkirina mafên mirovan di asta cîhanê de kete rûpelê dîrokê û wiha got: “Îro 16ê Adarê ye. Di ser komkujiya Helepce ya 16ê Adara 1988an re 37 sal borîn. Pêwist e êrîşa bi çekên kîmyewî ya di 1988an de ji aliyê rejîma Iraqê ve, di bin serokatiya Sedam Husên de li dijî gelê Kurd li bakurê Iraqê pêk hat, di dîroka cîhanê de wek yek ji tawanên herî hovane yên li dijî mirovahiyê bê bibîranîn. Ev komkujiya Helebceyê di dîroka mirovahiyê de ne tenê hewldaneke qirkirina nijadî ya li dijî Kurdan bû. Di heman demê de veguherî yek ji mezintirîn êrîşên kîmyewî ya binpêkirina mafên mirovan a li ser asta cîhanê û kete rûpelê dîrokê.”
Mehmet Oktay, destnîşan kir ku piştî komkujiyê jî ji ber bandora gazê gelek kesan jiyana xwe dest dan û got: “Di 16ê Adara 1988an de bajarê Helebce ji aliyê artêşa Iraqê ya di bin fermandariya Sedam Husên de bi çekên kîmyewî hate bombekirin û bi hezaran welatiyan bi awayekî hovane jiyana xwe ji dest dan. Ev çekên kîmyewî li dijî jin, zarok, kal û pîr û sivîlên bêparastin hat bikaranîn. Bi hezaran kes di cih de jiyana xwe ji dest dan û bi deh hezaran jî bi giranî birîndar bûn. Nêzî 3- 5 hezar welatî hatin kuştin. Bi deh hezaran welatî jî nexweş ketin.”
Hêzên navdewletî bersiva bêwist neda Seddam Husên
Mehmet Oktay xwest hemû sucdar di dadgeha qada Navdewletî de bêne cezakirirn û got: “Komkujiya Helebceyê ji pirsgirêka siyaseta navxweyî ya Iraqê zêdetir pirsgirêka qada navdewletî ye. Hêzên navdewletî bersîva pêwist neda Seddam Husên. Hêj Neteweyên Yekbûyî û rêxistinên din ên navneteweyî ev sûcê mirovahiyê wekî komkujî (jenosîd) qebûl nekiriye.”
Divê qada navdewletî Komkujiyê nas bikin
Hevseroka DBPê ya Amedê Sultan Yaray jî diyar kir ku komkujî tu carî nayê jibîrkirin û got: “Di ser komkujiya Helepceyê re 37 sal borîn. Çiqas sal derbas bibin jî em ji bîr nakin. Em bang hêzên navneteweyî dikin ku vê komkujiqê nas bikin û wekî sûcê li dijî mirovahiyê qebûl bikin.”
