Enqere – Girseya ku di salvegera 10emîn a komkujiya 10ê Cotmehê ya Garê de li cihê komkujiyê qurbanî bibîranîn, xwestin, “Meşa edaletê” li dar bixin. Polîsan bi xaza îsotê êrişî girseyê kir. Girsê bi berzkirina dirûşmeyan bertek nîşanî êrişa polîsan da.
Sendîkaya Kedkarên Şoreşger (DÎSK), Konfedarasyona Sendîkayên Karkerên Cameweriyê (KESK), Odaya Avahîsaz û Endezyaran a Tirk (TMMOB), Yekitiya Bijîşkên Tirk (TTB) û Komeleya Aştiyê ya 10ê Cotmehê, di salvegara komkujiya 10ê Cotmehê de li cihe ku komkujî pêk hatibû bernameya bîranînê li darxist. Hevserokê Giştî yê Partiya Wekhevî û Demokrasiyê ya Gelan (DEM Partî) Tuncer Bakirhan, endam û nûnerên saziyên sivîl, xizmên qûrbaniyan, partiyên siyasî û sedan kes tevlî bîranînê bûn.
Piştî bernameya bîranînê girseyê xwest ji Stasyona Garê heta Edliyeya Sihhiyeyê “Meşa edaletê” li dar bixin. Girsê li vir rastî astengiya polîsan hat. Girseya bertek nîşanî dorpêç û astengiya polîsan da û xwest bimeşe. Li ser vê yekê polîsan bi xaza îsotê êrişî girseyê kir. Bi ser vê yekê kesên ji bo bîranînê kom bûne demekê dirêj li ber barîkatan dirûşmeyên, “Dê hesaba Amed, Pirsûs û Enqereyê were pirsîn”, “Yên li ber xwe didin wê hesabê ji kujeran bilirsin”, “10ê Cotmehê ji bîr nêke û nede ji bîrkirin” û “Enqere dê ji faşîstan re bibe goristan” berz kirin û bertek nîşanî astengiyê dan.
Çalakiya rûniştinê dan destpêkirin
Girse li dijî astengiyê, li ber barîkatan, bi pankart û wêneyê qurbaniyên komkujiyê, çalakiya rûniştinê da destpêkirin. Di çalakiya rûniştinê de girse , dirûşmeyên “Me berdêl da, em ê hesapê bipirsin”, “Em ê faşîzmê di xwîna ku rijandiye de bifetisînin”, “Bijî yekitiya karker û wekheviya gelan”, “Em soz didin şehîdan dê aştî pêk were” û “Kujer AKP dê hesabê bide gel” berz kir. Piştî çalakiya rûniştinê girsê bi berzkirina dirûşmeyan belav bû.
