Şanoya Bajêr a Şaredariya Bajarê Mezin a Amedê promiyera lîstika bi navê “Xewna Şeveke Havînê” ku yek ji berhemên William Shakespeare e û wergerandine Kurdî li Çand Amedê hat lidarxistin.
Şanoya Bajêr a Şaredariya Bajarê Mezin a Amedê lîstika bi navê “Xewna Şeveke Havînê” ku yek ji berhemên William Shakespeare û wergerandine Kurdî li Çand Amedê pêşkeşî şanohezan kir. Şanoya Bajêr duh promiyera lîstika xwe ya ku Kawa Nemir wergêrandiye li Çand Amedê li dar xist. Bi sedan şanohezan eywana promiyera lîstikê lê hate kirin tejî kirin. Ji ber cih nema gelek kesan li ser derenceyan lîstik temaşe kirin. Şanohezan di dema lîstikê de gelek caran bi ken û çepikên xwe keyfxweşiya xwe nîşan dan.
Di lîstika ku Ferhad Feqî derhêneriya wê kiriye de Berfîn Emektar, Halît Aslan, Mesût Erencî, Nûrşen Adiguzel, Nazmî Karaman, Ozcan Ateş, Omer Akkan, Perînaz Delazy, Sena Ozbey, Sakîna Aktaş, Şahperî Alphan, Şehabettîn Dag, Yavûz Akkûzû û Zeycan ateş lîstin. Di dawiya lîstikê de şanohezan li ser piyan ji bo lîstikvanan li çepikan dan. Dû re Cîgira Sekretera Giştî ya Şaredariya Bajarê Mezin a Amedê Mûhabbet Erdogmûş kulîlk dan derhêner, lîstikvan û kesên tevkarî li lîstikê kirine. Lîstika Xewna Şeveke Havînê dê îro jî û 27 û 28ê Adarê jî li Çand Amedê bê lîstin.
Naveroka Lîstikê
Her çiqas lîstik li ser êvîndarîyê jî be, Shakespeare di metna xwe de rexneyê li kesayetîya mirovan û li zagonên civakê jî dike. Eşq ne ew tiştê ku mirov heta hetayê jiyana xwe li ser bike û xwe ji bo wê bide kuştin. Her tişt di rojekê de dikare bi “sêhrekê” an bi “xewnekê” biguhere.
Di lîstikê de têkilîyên evînê ku li ser berjewendîya desthilatdarîyê pêk hatine, ew qas “hesas” in ku dikare di xewnekê de hemû pevgirêdana “eşqa mirovan” bi awayekî berovajî biguherîne û dîsa weke ku tiştek neqewîmî be vegerîne rewşa berê. Ev guherîn gelek caran ne di destê mirovan de ye, di “sêhrê” de ye. Sêhr hem dikare henekê xwe bi mirovan bike hem jî mirovan bextewar bike. Lê weke her tiştî dawîya sêhrê jî heye. Bi şîyarbûnê re “morîka xewê” ji guhê mirovan derdikeve.
Dema tiştên neditî û ecêb biqewime mirov li xwe nagire û xwe davêje bextê “xewnê”. Di van xewnan de, bi xêr û gunehên xwe hemû dimênên tirs û xwestekên mirovan pêk tên. (Ji xwe şano jî, ji roja roj de bi xewn û xeyalan dide û distîne, dikenîne, ditirsîne, digirînê…)
