Amed – Rêveberên ÎHDa Amedê têkildarî êrişên li ser Rojava axivîn û wiha gotin: “Ji bo sekinandin şer em ê bixebitin û têbikoşin lê divê demildest korîdora jiyanî were vekirin.”
Çeteyên HTŞ û DAIŞa ku Tirkiye piştgiriyê dide wan, êrişên xwe yên li ser Rojava ji 6ê Çileyê ve berdewam dikin. Çeteyên HTŞê di rojên dawî de êrişên xwe yên li ser Rojava zêde kirine. Bertek û nerazibûnên li dijî van êrişan jî zêde dibin. 4 aliyên Kurdîstanê û gelek welatên derve yên cîhanê ji bo piştgiriya Berxwedana Rojava çalakî li dar dixin. Têkildarî êrişên li ser Rojava Hevseroka Komeleya Mafê Mirovan (ÎHD) a Amedê Sûzan Mehmetoglu û Rêvebera ÎHDê ya Amedê Eylem Kaya ji ajansa me re axivîn.
‘Divê ev şer bê sekinandin’
Rêvebera ÎHDê Eylem Kaya diyar kir ku tevahiya cîhanê bûyerên ku diqewime dibîne û da zanîn ku li Rojava şerekî gelek giran didome. Eylem Kaya bal kişand kirinên çeteyên êrişî Rojava dikin û wiha got: “Bi taybetî laşê jinan gelek tê perçiqandin. Em hinek dîmenan dibînin ku bi rastî jî em dibêjin ev şer ne tenê şerekî li dijî netewekê ye. Em dibînin ku şereke sîstematîk li ser laşê jinê jî tê birêvebirin. Me wek Komîsyona Mafê Jinan a ÎHDê ji Neteweyên Yekbûyî (NY), Ewropa, sazî û gelek rêxistinên Ewropî re bang kir. Me duh têkildarî vê mijarê daxuyaniyek da. Em bawer dikin ku îro li her dereke cîhanê jî mafê jinên tên binpêkirin. Dibe ku ev veşartî jî be, nikaribe dengê xwe jî derxe. Lê mixabin li dijî vanan tiştek nayên kirin an jî dereng tê dîtin. Ji bona ku ev derengî êdî çênebin, em ji wan re nameyan dişînin an jî bi daxuyaniyan, em dengê xwe didin bihîstin da ku van binpêkirinan û vî şerî bidin sekinandin.”
‘Teqez bila rêya alikariyê bê vekirin’
Eylem Kaya destnîşan kir ku hem mafê jinan, hem jî ê zarokan tên binpêkirin. Eylem Kaya bal kişand ser sûcên li cîhan û Tirkiyeyê li dijî jin û zarokan tên kirin û wiha dirêjî da axaftina xwe: “Lê dema bi taybetî li Rojava Kurd tên kuştin. Çima qanûn nayên pêkanîn. Li Bakur jî gelek welatî kom dibin, dadikevin qadan. Divê koridora mirovî were vekirin û divê alîkarî biçe herêmê. Ji ber ku av nîn e, xwarin nîn e, gelek zarokên nû tên dinyayê, dimirin. Ji ber ku nexweşxane tune ye, derman tune ye, xwarin tune ye, ava paqij tune ye.Heke korîdora mirovî bê vekirin û divê alîkarî ji wan re werin şandin. Divê em hem alîkarî bişînin, hem aştiyê pêk bînin hem jî travmayên li herêmê çêbûne bidin derbaskirin. Niha ne dema axaftinan e. Divê em niha birçîbûn û ji mirinên ji sermayê bidin sekinandin. Li Bakur jî gelek kes ji bo alîkariya Rojava tiştan kom dikin kampanyayan didin destpêkirin. Lê rê nîn e, ku biçe Rojava. Li vê derê li mirovên ku ji bo Kobanê û Hesekê dakevin qadan gelek zext û zordarî hene. Mînak yek dirûşm were berzkirin polîs êrîş û îşkenceyê dike. Gelek zarok jî hatine binçavkirin.”
‘Jiyana di bin xetereyê de ye’
Hevseroka ÎHDê ya Amedê Sûzan Mehmetoglu li ser îşkenceya li ser bedena jinan tê kirin sekinî û wiha got: “Şer bi taybetî jî li ser jinan tê meşandin. Laşe jinê tê tehrîbkirin, bedena jinê ji qatên bilind tê avêtin. Zarok ji serma jiyana xwe ji dest didin. Divê em dengê xwe li cîhanê bilind bikin. Me duh ji Yekîtiya Ewropa (YE) Dewleyên Yekbûyî yên Amerîkayê (DYA), Neteweyên Yekbûyî (NY) name şandin û me ji wan re banga ‘Li hember vî şerî dengê xwe bilind bikin, şer bidin sekinandin, berpirsyariya xwe bila bînin cîh’ kir.”
‘Demildest bila korîdora jiyanî bê vekirin’
Sûzan Mehmetoglû di dawiya axaftina xwe de ev tişt gotin: “Li Xezayê jî korîdoreke însanî hatibû vekirin. Îro divê tevahiyê cîhanê rabe ser pêya. Li Kobanê jiyana zarok, jin û hemwelatiyên herêmê di bin xetereyê de ye. Ji bo ku ji wan re alîkarî bê kirin divê demildest korîdoreke jiyanî were vekirin.”
