Rêveberiya Xweser a Bakur û Rojhilatê Suriyeyê diyar kir ku ew alîgirên diyalogê ne, lê hikûmeta demkî ya Sûriyeyê berpirsyara hemû destdirêjiyan e û bang li hêzên garantor kir ku erkên xwe bicîh bînin.
Rêveberiya Xweser a Bakur û Rojhilatê Sûriyeyê derbarê êrişên çeteyên HTŞ û SMOyê daxuyaniyek da.
Daxuyaniya ku li ser malpera Rêveberiya Xweser hat belavkirin wiha ye;
“Em geşedanên dawî ku bi êrişên berdewam ên ji aliyê komên girêdayî hikûmeta demkî ya Şamê ve li ser deverên me têne kirin û binpêkirinên giran ên pê re ku bandorê li sivîlan dikin, ewlehî û aramiya herêmê dixe xetereyê, ji nêz ve dişopînin.
Van aliyan bi awayekî aşkere peymana ku duh pêk hat, binpê kirine. Peymanek ku armanca wê rawetandina rageşiyê û vekirina rêya li ber çareseriyên ku aştiya sivîl diparêzin bû . Ji ber vê yekê, em bi aşkerahî dibêjin ku hikûmeta demkî ya li Şamê berpirsiyariya tevahî binpêkirin û destdirêjiyên ku îro diqewimin digire ser xwe. Ji ber ku ev komên êrişkar ji aliyên siyasî û leşkerî ve di bin kontrola wê de ne. Rageşiya heyî encamek rasterast a vê binpêkirina bi zanebûn e.
Ev binpêkirinên berdewam kirine û hîn jî dibin sedema windakirina gelek jiyanên li Sûriyeyê û zêdekirina êşa gelê Sûriyeyê ku ji ber şer û pevçûnên bi salan westiyaye. Berdewamiya vê rêbazê tenê xizmeta dijminên Sûriyeyê dike û welat bêtir ber bi wêraniyê ve dibe.
Rêveberiya Xweseriya Demokratîk, li ser bingeha berpirsiyariya xwe ya neteweyî, bang li aliyên peywendîdar dike ku bi lez, tevahî şertên peymana hatiye çêkirin bi cih bînin û hemû kiryarên leşkerî ku ewlehiya sivîlan tehdît dikin û aramiyê têk dibin, rawestînin.
Her wiha em bangek zelal li aliyên garantor ên peymanê, bi taybetî jî li hevpeymaniya navneteweyî dikin ku erkên xwe bi cih bînin, bixebitin da ku rê li ber van binpêkirin bigirin, bicîhanîna peymanê bi awayekî misoger bikin ku jiyana Sûriyeyiyan biparêze û rê li ber aloziyeke berfirehtir bigire.
Di vê çarçoveyê de, em bang li gelê Sûriyeyê bi giştî û bi taybetî jî li keç û xortên me yên li Herêma Bakur û Rojhilatê Sûriyeyê dikin ku rihekî berpirsiyariya neteweyî nîşan bidin, yekîtiya neteweyî di navbera hemû pêkhateyên Sûriyeyê de biparêzin, nekevin nav gurkirina hin berdevk û dezgehên çapemeniyê ku armanc wan ew e Sûriyeyê bixin nav çerxek şer a nû ku ji bilî dijminên gelên Sûriyeyê ti kes serkeftî nabe.
Mebesta me dê her tim bijartina diyalogê, parastina aştî, rûmet û ewlehiya gelê me, xebata ji bo Sûriyeyeke yekgirtî û demokratîk kut ê de edalet û hevwelatîbûna wekhev serdest be.”
