Wan – Rojnamevan û rêveberê medyaya dîjîtal a Kanal 8ê Dewran Mehmûd ku derbarê hedefgirtina rojnamevanan de axivî û diyar kir ku her cara rojnameveke/î çapemeniya azad tê armancgirtin, rastiyek mezin winda dibe û got: “Dewletên êrişkar naxwazin dîmenên sûcên wan ên dermirovî bên tomarkirin û bên nivîsîn.”
Rojnameger Nazim Daştan û Cîhan Bîlgîn di 19ê Kanûnê de dema geşedanên li Bakur û Rojhilatê Sûriyeyê dişopandin, li ser rêya di navbera Qereqozaq û Bendava Tişrînê de di êrîşa balafira şer (SÎHA) de hatin kuştin. Li dijî vê yekê gelek sazî, kesayet û rojnamevanan bertek nîşan dan û kuştina rojnamegeran şermezar kirin. Rojnameger û rêveberê medyaya dîjîtal a Kanal 8ê (Channel 8) Dewran Mehmûd ku di beşa siyasî û çandî de rojnamegeriyê dike, bertek nîşanî êrîşên li ser rojnamegeran da, diyar kir ku di warê rojnamegeriyê de bi qetilkirina Nazim Daştan û Cîhan Bîlgîn li Rojava valahiyek mezin çêbû.
‘Di şer de herî zêde rojnamegeran dikin hedef’
Dewran Mehmûd ku behsa girîngiya rojnamevaniyê ya di rewşên şer de kir, diyar kir ku Rojhilata Navîn herêmeke tije pevçûn û alozî ye, lewma jî gelek pîşeger di nav metirsî û gefên tund de jiyan dikin. Dewran Mehmûd, anî ziman ku rojnamegerî di nav wan pîşeyan de ya herî metirsîdar e û got: “Ji ber ku dema em hewl didin destê xwe bigihînin rastî û naveroka gelek bûyeran rojnamegerî dibe pîşeya herî metirsîdar. Ez wekî rojanemvanekî, timî hewl didim rastiyê bernedim û bibim alîgirê wê. Heqîqet û rastiya bingehîn jî li cem wan kesan e ku ji bo azadî û aştiya civakî jiyana xwe feda dikin û têkoşînê dikin.”
‘Sûcdar naxwazin sûcê wan bên dîtin’
Di berdewamiya axaftina xwe de Dewran Mehmûd da zanîn ku êş û trajediya Kurdan di serdema modern de bi giştî ji aliyê rojnamevanan ve hatiye belgekirin û gihandin. Dewran Mehmûd, destnîşan kir ku wan ev yek bi sereke di jenosîda Helebceyê û gelek qirkirinên din de ditiye û ev tişt li axaftina xwe zêde kir: “Ev belgekirina ji aliyê rojnamevanan ve, sedemên sereke ne ku cîhan bi van kiryaran dihese û van sûcên mirovî dide naskirin. Dewletên êrişker giringiya rojnamevaniyê dizane û naxwaze dîmenên sûcên wan ên dermirovî ji çavê kamereyên me ve werin tomarkirin û bi pênûsa me were nivîsandin. Her cara ku rojnameveke/î çapemeniya azad tê armancgirtin, rastiyek mezin winda dibe.”
‘Daştan û Bîlgîn çavkaniyên gelek kesan bûn’
Bi domdarî Dewran Mehmûd bal kişand ser kuştina Nazim Daştan û Cîhan Bîlgîn û bi bîr xist ku Nazim Daştan û Cîhan Bîlgîn çavkaniyên gelek rojnamevan û medyayên din bûn.
Dewran Mehmûd, destnîşan kir ku her çendî nûçegihanên wan li Rojava hene jî, bi kuştina Nazim Daştan û Cîhan Bîlgîn, li herêmê valahiyek mezin çêbû û wiha pê de çû: “Kuştina Daştan û Bîlgîn di çapemeniya azad a qada Rojavayê Kurdistanê de li tevahiya cîhanê valahiyek mezin çêkir. Ev kiryar tenê nayê wateya ku jiyana du rojnamevanan hatiye stendin, mafên civaka xwecihî û navdewletî ya bidestxsitina rastiyê jî hatiye desteserkirin.”
‘Ji bo rojnamevanên Kurd bêdeng nemînin’
Dewran Mehmûd, dûbare kir ku her cara rojnameveke/î çapemeniya azad tê armancgirtin, rastiyek mezin winda dibe û ew ji bo ku rastî winda nebin dê kamere û pênûsa wan li erdê nehêlin. Dewran Mehmûd, wiha dawî li axaftina xwe anî: “Banga min ji raya giştî ya cîhanê ew e ku ew çawa li hemberî kuştina rojnamevanên li Xezeyê derketin qadan, bila wisa jî ji bo rojnamevanên Kurd bêdeng nemînin. Kurd naxwazin êdî tenê çiya dostê wan bin, em piştgiriyeke hîn bêtir mirovî û manewî dixwazin. Herî dawî dibêjim, dewletên dijî me, ne tenê dijî jiyana rojnamevanan in, lê belê ew êrişî xweza û candarên vê erdnîgariyê jî dikin.”
