Rojnameger Celalettîn Yalçin ê ku bi îdiaya “endamtiya rêxistinê” dihat darizandin, di danişîna ewil de hate tehliyekirin.
Rojnameger Celalettîn Yalçin bi îdiaya “endamtiya rêxistinê” hatibû girtin. Danişîna ewil a doza rojnameger Yalçin, li 37’emîn Dadgeha Cezayê Giran a Stenbolê ya li Çaglayanê hate lidarxistin. Yalçin ku li Girtîgeha bi Ewlekariya Bilind a Kirşehîrê dihat ragirtin, bi rêya Pergala Deng û Dîmen (SEGBÎS) tev li danişînê bû. Parêzerê Yalçin, Hevserokê Giştî yê OHDÊ Serhat Çakmak jî di danişînê de amade bû. Hevserokê DFGê Selman Çîçek, rojnameger û malbata Yalçin jî beşdarî rûniştina dozê bûn.
Yalçin xwest parastina xwe bi Kurdî bike û dadgehê qebûl kir. Serokê dadgehê got ku Dadgeha Bilind cezayê Yalçin betal kiriye û nirxandina Yalçin jê pirsî. Yalçin jî got ku ku biryara Dadgeha Bilind qebûl dike.
Dozgeriyê xwest rewşa girtî ya Yalçin bidome. Yalçin jî li dijî mutalayê parastina xwe kir û got: “Nêzî 3 sal in girtî me. Hem min hem jî malbata min ji hêla madî û manewî ve zehmetî kişand. Daxwaza beraetê û tehliyeya xwe dikim.”
Parêzer Serhat Çakmak jî bi bîr xist ku miwekîlê wî zêdetirî 2 sal in girtî ye, beriya niha jî hatibû girtin û hema hema tevahiya înfaza xwe temam kiriye. Çakmak biryara dadgeha bilind bi bîr xist û daxwaza tehliye û beraetê kir.
Şandeya dadgehê jî bi şertê kontrola edlî biryara tehliyeya Yalçin da.
