Serdozgeriya Komarê ya Şirnexê derbarê nûçegihanê ajansa me Nedîm Orûç ê bi lêdanê hatibû binçavkirin de îdianame amade kir. Dozgerî rojnamegerî û xebatên rojnamegeriyê weke sûc hesiband.
Nûçegihanê ajansa me Nedîm Orûç di 14ê Çileyê li taxa Nûr a Cizîrê dema ku nûçe dişopand bi lêdanê hate binçavkirin û piştre hate girtin. Derbarê nûçegihanê me Nedîm Orûç de îdianame hate amadekirin. Serdozgeriya Komarê ya Şirnexê di îdianameyê amade kiriye de tevî ku di stuyê Orûç de kamera hebû, bi hincetên “Madeyên bi talûke bêyî destûr bi xwe re gerandin û veguheztin”, “di meş û çalakiyan de ji bo xuya neke ruyê xwe veşartin”, “propagandaya rêxistinê”, “astengkirina pêkanîna erkê” îdianame amade kir û xwest Orûç were cezakirin. Di îdianameyê de nûçeyên ku rojnameger Nedîm Orûç amade kirine wek sûc hatin hesibandin.
Îdianameya sosret
Tevgera Azadiyê ya Kurd dema di 26ê Cotmeha 2025an de daxuyand ku dê ji Bakurê Kurdistanê hêzên xwe vekişînin. Dozgerî şopandina vê nûçeyê wek sûc hate nîşan da. Herwiha kolandina goristanan û nûçeyên amade kiriye û li ser hesabên xwe yên medyaya sanal parve kirine jî ji bo Orûç sûc hatin hesibandin. Herwiha di îdianameyê de hat gotin ku di sala 2016an de li navçeya Cizîrê li ser kovara bi navê “Ciwanên Şoreşger ên Jin” şopa destê Orûç hatiye dîtin ji bo kovarê jî tê îdiakirin hatiye qedexekirin. Dîsa dema binçavkirinê de jî dîmenên Orûç kişandine wek hêmayên sûc hatin hesibandin.
1emîn Dadgeha Cezayê Giran a Şirnexê îdianameya ku dozgeriyê amade kiriye û rojnamgeriyê wek sûc dihesibîne qebûl kir. Danişîna ewil a nûçegihanê me Nedîm Orûç dê di 24ê Nîsanê were lidarxistin.
