Komeleya Hîndekariya Kurdî ya li giştiya Swîsreyê dibistanên kurdî saz dike û bi rê ve dibe, bi navgîniya bidawîbûna sala xwendegehê ya 2024-25an bawernameyên şagirtan bi şahiyeke dan. Dayik û bavên şagirtan û gelek kes tevlî şahiyê bûn.
Li bajarê Zurichê yê Swîsreyê 36 şagirt li heman dibistanê wek çar polan ji asta berî xwendegehê heta asta jorîn tev li dersên kurdî dibin. Şagirt hînî ziman, çand, dîrok, erdnîgarî û çîrokên kurdî dibin û temenê wan di navbera 6-14 salî de tê guhertin. Dibistan rojên şemiyê danê sibehê xizmetê dide zarokên kurd. Kesên dixwazin zarokên xwe li xwendegeha kurdî bidin qeydkirin, dikarin li ser malpera kurdisch.ch serlêdanê bikin, an jî ji dibistana lê dixwînin forma serlêdanê ji mamosteyên xwe yên Swîsreyî bixwazin. Ji ber ku dibistanên kurdî yên Komeleya Hîndekariya Kurdî bi awayekî fermî, bi dibistana pedagojî ya Zurichê û bi mudîriyeta perwerdeyê ya Kantona Zurichê re bi hev re dixebitin, deqdan û notên zarok li ser bawernameya xwe distînin, rasterast derbasî ser bawernameya wan a xwendegeha Swîsreyî dibe û ev jî bandoreke erênî li ser bawernameya wan dike.
Komeleya Hîndekariya Kurdî ji sala 2007an û vir ve li Swîsreyê xebatên zimanê kurdî bi rê ve dibe û ji sala 2014an û vir ve bi awayekî fermî li dibistanên kantonan dersên kurdî dide.
Bi gelemperî niha li kantonên Baselstadt, Baselland, Aargau, Bern, Luzern û Zurichê bi tevlêbûna 10 mamoste, 100 şagirt û malbatên wan xwebatên zimanê kurdî û perwerdeya kurdî bi awayekî dildarî bi rê ve dibe.
Komeleya Hîndekariya Kurdî di çarçoweya xebatên xwe de, ji asta berî xwendegehê heta asta jorîn bi giştî 21 pirtûkên hîndekariya kurdî ji bo her polekê du pirtûk, ji bo deh salên perwerdeyê 21 pirtûk amade kirine û pirtûkên çîrokan ji zimanên biyanî wergerandiye kurdî ku zarok bi dilxweşî bixwînin.
Şagirtên îro bawernameyên xwe ji dest mamosteyên xwe girtin, mamosteyên bawername dan. Dayik û bavên şagirtan diyar kirin ku ew bi dilxweşî tên xwendegeha kurdî, bi zimanê dayika xwe dixwînin, dinivîsin, diaxivin, distirên, govendê digirin, wêneyan xêz dikin û bi hev re hevaltiyê ava dikin. Ew ji vê yekê jî dilxweş in û spasiya xwe ji Komeleya Hîndekariya Kurdî re diyar kirin, da ku ev xizmeta bêhempa daye wan û zarokên wan. Şahiya dayîna bawernameyan bi stranêm stranbêj Yadîgar bi dawî bû.
Hêjayî bibîrxistinê ye ku vê hefteyê şagirtên li Baselstadt û li Zurichê bawername wergirtin, roja çarşemê yên li Basellandê û li Bernê, roja sêşemê jî yên li Luzernê wê bawernameyê xwe bigirin û dawiya meha hezîranê wê xwendegeh dest bi bînvedana havînê bikin, heta meha îlonê dest bi saleke nû ya hîndekariyê bikin.
