Riha – Bi ser rizgarkirina Kobanê re 11 sal derbas bûn. Dayika Aştiyê Meyaser Korkmaz dema Kobanê ji aliye DAIŞê ve hat dorpêçkirin 6 mehan li ser sînorê Kobanê di nobeda berxwedanê de maye diyar kir ku Kurdan wê demê bi ruhê yekîtiyê Kobanê rizgar kirin û diyar kir ku divê niha jî bi heman ruhî were parastin.
Piştî şerê navxweyî yê Sûriyeyê li bajarên rojavayê Kurdistanê gel rabû serhildanê û bi îlankirina kantonan xweseriya xwe ava kirin. DAIŞa ku arteşa 2 dewletan nekariye pêşî lê bigirê ji hêla Yekiniyên Parastina Jinan (YPJ) û Yekiniyên Parastina Gel (YPG) hatin têkbirin û bûn heviya gelan. DAIŞê di 13ê Îlonê 2014an de li dijî kantona Kobanê êrişeke mezin da destpêkirin. Piştî êrişa DAIŞê gelê Kurd her çar aliyên Kurdistanê û li derveyî welat rabûn ser pêyan. Li sînorên Nisêbîn a navçeya Mêrdînê û Pirsûsê ya Rihayê yên Bakurê Kurdistanê Kurd ber bi Kobanê ve herikîn. Li başurê Kurdistanê jî bi heman ruhî gelê Kurd berê xwe dan Rojavayê Kurdistanê. Li qada navneteweyî jî gelek kesên azadîxwaz tevlî şerê li Kobanê bûn. Di encama berxwedaneke mezin de di 26ê Çileya 2015an de Kobanê rizgar bû û DAIŞ têk çû.
Têkçûyina DAIŞê û rizgarbûna Kobanê taybet ji bo gelê Kurd û ji bo gelên cîhanê bû hevî. Piştî rizgarbûna Kobanê Rêveberiya Xweser a Bakur û Rojhilatê Sûriyeyê hat ragihandin û ev rêveberî ser paradigmaya Neteweya Demokratîk a Rêberê Gelê Kurd Abdullah Ocalan hat damezrandin. Li dijî pergala netewe dewlet a kapitalîzmê pergala Netewa Demokratîk ku wekhevî û azadiya gelan esas digirê, ji bo gelên bindest û ji bo gelên li herême bû ronahiyek. HTŞê ku ji berê ve wek El Nusra dihat binavkirin, bi têkibirina rejîma Baasê û bi piştgiriya hezên navneteweyî hat desthilatê û li dijî pirrengî û aştiya gelan re bû metirsî. Çeteyên girêdayî HTŞê li dijî baweriyên cuda û kêm neteweyên li Sûriyeyê şer da destpêkirin, ji civaka Elewî û Dûrziyan sedan welatî qetil kir û hêj jî li herêmê dibe sedema metirsiya komkujiyên nû.
Bi rûhê Kobanê gel di seferberiyê de ye
Piştî civîna Parîse ya di navbera HTŞê, Tirkiyê û Îsraîlê pêk hat, HTŞ çeteyên DAIŞ û yên giredayî Tirkiyeyê jî di nav de, di 6ê Çileyê de êrişî taxên Şêxmeqsûd û Eşrefiyê kirin. Piştî êrişên taxên Şêxmeqsûd û Eşrefiyê çeteyan vê carê berê xwe dan herêmên Rêveberiya Xweser. Piştî êrişên çeteyan Rêveberiya Xweser seferberî ragihand û li ser seferberiyê li çar aliyên Kurdistanê û derveyî welat gel herikî qadan û tevlî seferberiyê bû. Bajarê Kobanê careke din ji aliye çeteyên weke DAIŞ, SMO, HTŞ û Tirkiyeyê ve hat dorpêçkirin û li dijî dorpeçe gelê Kurd ji bo parastina destkêftiyên şoreşê daketin qadan. Dayika Aştiyê Meyaser Kokmaz ku di dema berxwedana Kobanê de 6 mehan li ser sînorê Kobanê yê navçeya Pirsûsê di nobeda berxwedanê de bû anî ziman ku bi rihê yekitiyê çawa Kobanê hat rizgarkirin, divê bi heman rihî jî were parastin.
‘Heta Kobanê rizgar bû di nobe de bûn’
Meyaser Korkmaz bi lêv kir ku ew heta rizgarkirina Kobanê li ser sînor di nobede de bûnê û derbarê wê nobetê de wiha qal kir: “Piştî DAIŞê êrişî Kobanê kir, em bi hezaran kes çûn ser sînor. Em 6 mehan li ser sînor bûn. Heta rizgariya Kobanê em li ser sînor bûn. Berxwedaneke mezin hat dayin. Berxwedana me ya li ser sînor hêz dida şervanan jî. Bi ked û berdelên giran Kobanê rizgar bû. Bi gotinan em nikarin qala wan deman bikin. Berxwedaneke mezin bû. Gelê Kurd bi rihê yekitiyê, berxwedaneke mezin nişan da. Li başur heta bakur Kurd bûn yek. Hemû Kurd bûn yek û li ser sînor tevî êrişên polîsan paş ve gav neavet. Li wê derê li gel sir û seqemê gelê Kurd li ber xwe da heta Kobanê rizgar bû.”
‘Em ê nahêlin Kobanê bikeve’
Di berdewama axaftina xwe de Meyaser Korkmaz diyar kir ku divê Kurd li her derê bi ruhê yekitiyê ku Kobanê rizgar kiriye dakevin qadan û wiha pê dê çû: “Divê niha jî dîsa weke wê demê Kurd bi rihê yekitiyê xwedî li Rojava derbikevin û biherikin Kobanê. Divê dîsa Kurd herikin ser sînor. Sedema êrişan Kurdbûn e. Qebûl nakin Kurd xwedî statû û destkeftî bin. Ji bo destkêftiyên Kurdan ji holê rakin êriş dikin. Divê Kurd vê bizanibin. Kurdên xwedî rûmet divê vê bizanibin û dîsa weke wê demê li ser sînor em jî li ber xwe bidin. Divê Kurd werin û dîsa bi yek dengî çi ji dest me hat em bikin. Gelê Kurd nahêle Kobanê bikeve. Kobanê bikeve em ê jî bikevin. Em nahêlin Kobanê bikeve. Me ji bo Kobanê berdelên mezin dan. Divê Kurd îro rabin ser pêyan. Em îro xwe xwedî dernekevin êdî tu car nikarin xwedî derbikevin. Hemû dinya li dijî me ye. Em jî li dijî vê bibin yek û li berxwe bidin. Em ê xwedî li Kobanê derbikevin û nahêlin Kobanê bikeve.”
‘Divê em xwedî pêvajoyê û Rojava derkevin’
Di dawiya axaftina xwe de Meyaser Korkmaz destnîşan kir ku êrişên li ser Rojava bandor li ser pêvajoyê jî dike û ev tişt gotin: “Weke Dayikên Aştiyê me her tim parastina aştiyê kir. Dîsa em parastina aştiyê dikin û daxwaza me jî aştî ye. Li Rojava zarok û jin tên kuştin. Ew êrişên li ser Rojava bandor li ser pêvajoya aştiyê ya li vir hatiyê destpêkirin jî dike. Em dibêjin bila kes nemirê. Bila her derê aştî pêk were. Em nahêlin Rojava bikeve û ev pêvajo jî têk biçe. Divê em her kes li vê pêvajoyê xwedî derkevin da ku li Rojava şer bisekine. Divê hemû gelê Kurd, Tirk û Ereb jî xwedî li aştiyê derbikevin da ku aştî jî pêk were.”
