Hevşaredara Amedê Serra Bucak di civîna taştê ya Serokatiya Daîreya Polîtîkayên Jinan a Şaredariya Bajarê Mezin a Amedê de bi rojnamegerên jin re civiya. Di civînê de xebatên Şaredariya Amedê ya sala 2025an bi rojnmegeran re hate parvekirin û nirxandin.
Serokatiya Daîreya Polîtîkayên Jinan a Şaredariya Bajarê Mezin a Amedê bi rojnamegerên jin ên li Amedê dixebitin re civînek taştê li dar xist. Civînel li otelek Amedê hate birêvebirin. Hevşaredara Amedê Serra Bucak, Hevseroka Rêxistina DEM Partiyê ya Amedê Gulşen Ozer, endamên Meclîsa Şaredariyê û gelek rojnamegerên jin beşdarî civînê bûn.
Beriya taştê bê dayîn axaftin hatin kirin. Serra Bucak di civînê de axivî û xebatên rêveberiya xwecihî yên jinan û xebatên Serokatiya Daîreya Polîtîkayên Jinan ên sala 2025an parve kir û nirxand.
‘Em dixwazin Amedê bikin bajarê jinan’
Hevşaredar Serra Bucak destnîşan kir ku çapemenî nebe, jin jî xuya nabin û û got: “Jinên ku di tevgera azadiya jinan de li ser polîtîkayên jinan kar dikin, bi perspektîfa jinan dixebitin. Heke rojnamegerên jin nebin, xebatên jinan ên şaredariyan jî xuya nabin. Me xwest em bi hevalên jin ên rojnameger re bên cem hev, hev nas bikin û xebatên xwe bi wan re parve bikin. Jin têkoşîna azadiyê didin meşandin. Hevalên jin ên rojnameger pirsgirêkên jinan li vî bajarî dikin nûçe û me agahdar dikin. Em dixwazin di xebat û polîtîkayên jinan de hin bêtir bi rojnamegerên jin re di nava danûstandinê de bin da ku pirsgirêk û tengezariyên jinan bên dîtin. Em dixwazin bi piştgiriya rojnamegerên jin Amedê bikin bajarê jinan û têkoşîna jinan bidin nîşandan.”
