Şirnex – Li Şirnexê 55 saziyên sivîl ji bo piştgiriya pêvajoyê daxuyanî dan. Serokê Odeya Bijîjkan a Şirnexê Serdar Kûnî û Cigirê Serokê Komeleya Astengdaran a Şirnexê Hakîm Kizilcan ku tev li daxuyaniyê bibûn xwestin dewlet jî ji bo pêşveçûna pêvajoyê gavan biavêje û qanûnan derxîne.
Piştî daxuyaniya Rêberê Gelê Kurd Abdullah Ocalan a bidîmen PKKê ji bo pêşveçûna pêvajoyê bi merasîmekê li bajarê Silemaniyê yê Herêma Kurdistanê çekên xwe şewitandin. Piştî merasîma PKKê çavê raya giştî ya Kurdistanê jî ji dewlete ye ku gavên şênber biaveje. Ji bo pêvajoya çareseriya pirsgirêka Kurd serbikeve gelek sazî jî daxuyaniyan didin û piştgiriya aştiyê dikin. Li Şirnexê jî 55 saziyên sivîl ên demokratîk, karmend û hiqûqî bi daxuyaniyekê piştgiriya pêvajoyê kirin.
Serokê Odeya Bijîjkan a Şirnexê Serdar Kûnî û Cigirê Komeleya Astengdaran a Şirnexê Hakîm Kizilcan ku tev li daxuyaniyê bibûn, piştgiriya xwe ya pêvajoyê anîn ziman û xwestin ji bo pêşveçûna pêvajoyê dewlet jî gavan baveje.
‘Divê ji aliyê dewletê ve jî zemîna hiqûqî pêk were’
Serokê Odeya Bijîjkan a Şirnexê Serdar Kûnî bi lêv kir ku piştî merasîma şewitandina çekan a PKKê divê dewlet jî ji aliyê hiqûqî ve gavan biavêje û ev tişt gotin: “Em jî piştgiriya pêvajoya aştiyê dikin. Ew nêzî 50 sal in li Kurdistanê şerek heye. Em jî dixwazin şer bi dawî bibe û gelên li vir dijîn bigihin aramiyê. Pêvajo bi tenê rawestandina çekan nabe. Divê edalet û daxwazên civakê jî pêk were. Ji bo wê jî em partiyên desthilat, muxalefet û saziyan re dibêjin ku piştgiriyê bidin pêvajoyê ku bila serkeftî encam bigire. Ew pirsgirêk bi tenê bi danîna çekan nabe. PKKê rol û mîsyona ketiye ser milê wê bi cih aniye û divê ji aliyê dewletê ve jî zemîna hiqûqî pêk were. Divê desthilat û muxalefet jî qanûnan derxînin ku ew pêvajo bi serkeftî encam bigire.”
‘Heta dawiyê piştgiriya pêvajoyê bikin’
Cîgirê Serokê Komeleya Astengdaran a Şirnexê Hakîm Kizilcan jî diyar kir ku ew ji bo destpêkirina pêvajoyê kêfxweş in û ev tişt anîn ziman: “Em jî weke komele piştgiriya aştiyê dikin. Em ji ber vê pêvajoyê pir kêfxweş in. Ev pêvajo ne tenê ji bo me ji bo hemû dinya û mirovan pêvajoyeke baş e. Em hevî dikin ku ev pêvajo bi serkeftî encam bigire. Divê ji bo pêvajo biçe serî dewlet jî mafê Kurdan ku daxwaz dikin pêk bîne. Em jî dê heta dawiyê piştgiriyê bidin û çi ji destê me were em ê bikin.”
