Sebahat Tûncel a di gotûbêja DEM Partiyê ya Îzmîrê li dar xist de li ser pêvajoya heyî axivî, destnîşan kir ku li Rojhilata Navîn birêxistinkirî be ew serdikeve.
Rêxistina DEM Partiyê ya Îzmîrê bi beşdariya aktîvîsta Tevgera Jinên Azad (TJA) Sebahat Tûncelê li avahiya xwe gotûbêjek li dar xist. Endam û rêveberên DEM Partiyê di nav de gelek kes beşdarî gotubêjê bûn. Di gotûbêjê de bang li hemû aliyên aştîxwaz û demokrat hate kirin ku bi gelên Rojava re di nav piştevaniyê de bin û hate diyar kir ku Li Rojhilata Navîn kî birêxistinkirî be, ew ê bi serbikeve.
‘Çareserî komara demokratîk e’
Sebahat Tûncel a di gotûbêjê de axivî, bal kişand ser girîngiya dema niha û destnîşan kir ku geşedanên li Tirkiye û Rojhilata Navîn dê pêşeroja kurdan diyar bike û got: “Manîfestoya birêz Ocalan a 27ê Sibatê ji bo pêşeroja gelan manîfestoyeke bivênevê ye. Dema li pêşiya me dema entegrasyona demokratîk e û çareserî jî komara demokratîk bi xwe ye. Rizgariya Rojhilata Navîn di vir de ye.”
‘Yekîtiya neteweyî ya Kurd li kolanan pêk hat’
Sebahat Tûncelê diyar kir ku êrîşên dawî bi armanca tunekirina îradeya Kurdan û qirkirinê hatine kirin. Tuncel bal kişand ser peymana ku hatibû îmzekirin û got: “Piştî rejîma Esad rûxiya, bi peymana Parîsê ya 5-6ê Çileyê êrîşên li ser Kurdan bi temamî hatin qebûlkirin. Lê belê, serhildana gelê Kurd a li her çar parçeyan ev êrîş bertefer kir. Yekîtiya neteweyî ya Kurd li kolanan pêk hat.”
Sebahat Tûncelê her wiha anî ziman ku nabe mirov pişta xwe bide hêzên emperyalîst û wiha domand: “Ji ber ku herî zû ew hêz Kurdan dixapînin; lewma divê kurd pişta xwe bidin ‘hêza xwe ya cewherî’ û her wiha heta mafên Kurdan nebin xwedî garantiyeke qanûnî, metirsî bi dawî nabe.”
‘Dorpêça li ser Kobanê didome’
Di dawiya axaftina xwe de Sebahat Tûncelê bal kişand ser rewşa mirovî ya li Kobanê û got: “Qutkirina av û ceyranê sûcekî li dijî mirovahiyê ye. Pêdiviya gelê li wir bi alîkariya lezgîn heye. Divê hemû kesên ku aştiyê dixwazin dengê xwe bilind bikin. Divê neyê ji bîr kirin ku li Rojhilata Navîn yê herî bi rêxistinkirî, qezenc dike.”
