Siyasetmedaran têkildarî merasima Koma Aştî û Civaka Demokratîk a îmhakirina çekan nirxandin kirin û anîn ziman ku PKK li ser gotina xwe rawestiya û xwestin ev pêvajoya aştiyê derbasî qonake nû ya siyasî û hiqûqî bibe.
Komek gerîllayên PKKê bi navê Koma Aştî û Civaka Demokratîk li ser banga Rêberê Gelê Kurd Abdullah Ocalan îro li Silêmaniyê bi merasimeke girseyî çekên xwe îmha kirin û bersiv dan banga Rêberê Gelê Kurd Abdullah Ocalan. Piştî merasimê serok û nûnerên partiyên siyasî fikrên xwe parve kirin.
Bafil Talabanî
Serokê YNKê Bafil Talebanî destnîşan kir ku biryara gerîla ji bo destpêkirina qonaxeke nû ya li Bakurê Kurdistan û Tirkiyeyê bi rêya dîyalog û aştiyê pêngaveke dîrokî ye. Biryara gerîla ji bo destpêkirina qonaxeke nû ya li Bakurê Kurdistan û Tirkiyeyê bi rêya dîyalog û aştiyê pêngaveke dîrokî ye. Baweriya me bi temamî heye, xwînrijîn mijarê kûrtir dike. Niha serdema bêdengkirina çekane, çûna ser mêzeyê gotûbêjê ye ji bo bidestxistina mafê rewa yên hemû aliyan. Ew pêngava aştiyê ku Mam Celal danî em îro bi cih tînin.”
Ozgur Ozel: Partiya me bi aştiyê re ye
Serokê Giştî yê CHPê Ozgur Ozel, têkildarî merasîma îmhakirina çekan a Koma Aştî û Civaka Demokratîk daxuyanî da. Ozgur Ozel, li ser hesabê xwe yê medyaya dijîtl got: “Partiya me bi aştiyê re ye.” Ozel, anî ziman ku wan şewitandina çekan “bi dilxweşî” pêşwazî kirine û got: “Di serî de rehmetî Sirri Sureyya Onder, em spasiya hemû siyasî û rayedarên ji bo pêvajo bigihije vê qonaxê ked dayîne dikin. Hêvîdarin ku ev gav bibe destpêka serdema bi temamî bêdengbûna çekan. Divê ev pêvajo; bêyî ku tu partî, derdorên civakî li derve bên hiştin û bêyî ku ji gel tiştek were veşartin, hewceye di bin sîwana Meclisê de, mutebeqeta civakî esas were girtin û bi gavên lez û bibiryar were birêvebirin.”
Nûman Kurtulmuş: Meclis pêvajoyê dişopîne
Serokê Meclisê Nûman Kurtulmuş ji bo çendek hevdîtinan çû Bosna-Hersekê. Kurtulmuş, têkildarî merasîma îmhakirina çekan a PKKê axivî û got ku pêvajo wekî hatiye plankirin pêş dikeve û got: “Her tişt bi niyetekê baş pêş dikeve. Ez bang li her kesî dikim ku piştgiriyê bidin pêvajoyê. Xebatên me yên ji bo komîsyonê êdî ber bi dawiyê ve ne. Pêvajo, ji hêla Meclisê ve ji nêz ve tê şopandin. Em ê tespît bikin bê ka ji ewil dê kîjan mijar bên destgirtin. Yek ji meseleya esasî ya komîsyonê, berdana çekan û şopandina pêvajoya fesixkirinê ye.”
Neçîrvan Barzanî: Em amade ne ku alîkariyê bikin
Serokê Herêma Federe ya Kurdistanê Nêçîrvan Barzanî jî têkildarî merasîmê li ser hesaba xwe ya platforma X’ê peyamek da û got: “Dê pêvajoya aştiyê derbasî qonaxeke nû bike. Em piştrastin ku ev gav dê pêvajoya aştiyê derbasî qonaxeke nû bike û gavên pratîk ên ku dê pêvajoya rast pêş bixe jî li pey bên avêtin. Di vê oxirê de, wekî her carê em amade ne ku her cureyên alîkariyê bidin û ji bo hêsankirinê peywira dikeve ser milê xwe bicih bînin.”
Nêçîrvan Barzanî, got: “Ji bo hewldan, piştevanî û keda birêz Serokkomar Erdogan a ji bo serkeftina pêvajoyê aştiyê, spasiya wî dikim û wî pîroz dikim.”
Dewlet Bahçelî: Sazumankarê PKKê li ser gotina xwe rawestiya
Serokê Giştî yê MHPê Devlet Bahçelî piştî merasîmê daxuyaniye destpêkê da. Bahçelî anî ziman ku ji aliyekî ve welat, li aliyê din jî herêm ber bi serdemeke nû û bi hêvî gav bi gav diçe. Ji xwe weke ku ji peyama dawî ya bi dîmen jî tê fêhmkirin, rêberê damezrîner ê PKKê li ser gotina xwe sekinî, soza xwe bi cih anî û gefên navneteweyî û herêmî di dema xwe de dît.”
