Enqere – Cîgirê Hevserokên Giştî yên DEM Partiyê Tayîp Temel ku ji Çapemeniyê Berpirsiyar e derheqê Konferansa “Aştî û Civaka Demokratîk a Navneteweyî” diyar kir ku ji gelek welatên cîhanê kesayetên navdar dê beşdarî konferansê bibin û got ku ew li serê dixebitin ku Îlham Ehmed jî beşdarî konferansê bibe.
Partiya Wekhevî û Demokrasiyê ya Gelan (DEM Partî) dê di 6-7ê Kanûnê de li Stenbolê Konferansa “Aştî û Civaka Demokratîk a Navneteweyî” li dar bixe. Li bendê ye ku ji Kurdistan, Tirkiye û gelek welatên cîhanê kesayetên navdar beşdarî konferansê bibin. Di konferansê de dê pêvajoya “Aştî û Civaka Demokratîk” a ku ji aliyê Rêberê Gelê Kurd Abdullah Ocalan ve hatiye destpêkirin bê nîqaşkirin. Ji Baskê heta Afrîkayê, ji Kazakistanê û heta Belçîkayê gelek kes dê bên beşdarî konferansê bibin. Her wiha rêxistina Sînn Feîn a Îrlandayê jî dê beşdarî konferansê bibe.
Cîgirê Hevserokên Giştî yên DEM Partiyê Tayîp Temel ê ji Çapemenî û Propagandayê Berpirsyar e derbarê konferansê de ji Ajansa Welat re axivî.
Gelek kesayetên navdar beşdar dibin
Tayîp Temel bi lêv kir ku armanca destpêkirina pêvajoya “Aştî û Civaka Demokratîk” ew e ku Kurd û netewên cuda neyên înkarkirin û wiha got: “Pêvajoya dîrokî ji 27ê Sibatê heta roja îro didome. Herî dawî Komîsyona Meclîsê jî çû bi birêz Ocalan re hevdîtin pêk anî. Ev pêvajo ji me re dibêje; ‘Em di demekê nû de ne, ji bo gelê Kurdistanê gelek taybetmendiyên wê hene’. Ji 27ê Sibatê vir ve gelek feylesofên navneteweyî, nivîskar û rewşenbîrên Xelata Nobelê wergirtine hema bêjê derdora 120 kesên navdar piştgiriya xwe ji bo banga birêz Ocalan diyar kirin. Gelek ji wan jî got heke pêvajo bi serkeftî encam bibe divê birêz Ocalan weke namzetê Xelata Nobelê nîşan bide. Ev jî tê maneyê ku ev pêvajo ji bo gelê Kurd xisûsiyetên taybet di nav xwe de dihewîne. Ji ber ku li cîhanê piştgiriyeke mezin heye. Kesên weke Slavoj Zizek, Neom Peach û gelek marksîstên Rojhilata Navîn û qada navneteweyî piştgiriya xwe ji bo fikir û rêmanên birêz Ocalan nîşan dan. Em bi vê konferansa 6-7ê Kanûnê dixwazin hinek mijarên di vê pêvajoyê de bi awayekî eşkere bê nîqaşkirin.”
Mabest û nevaroka konferansê
Tayîp Temel derbarê nevarok û mabesta konferansê de jî agahî dan û wiha pê de çû: “Hiqûqnasên navdar ên cîhanê vê pêvajoyê di perspektîfeke çawa de dibînin, feylesofên ku gelek ji wan sosyalîst in çawa fikra pêvajoya Komînên Demokratîk a birêz Ocalan dinirxînin. Dîsa hiqûqnasên navdar ên weke Mohammed Rauf û yên din ji bo mafê heviyê, ji bo azadî û serbestiya birêz Ocalan çi dibêjin. Mafê hêviyê mafekî gerdûnî ye. Ji bo wê jî em dixwazin van mijaran hemûyan bi vê konferansê, bi piştgiriya gelek çavdêran, ne tenê li beşdarên axêver guhdarî bikin, her wiha bila ev mijar werin nîqaşkirin.”
Peyama Abdullah Ocalan dê bê xwendin
Tayîp Temel diyar kir ku amadekariyên konferansê berdewam dikin û banga ji bo beşdariya kesayetên navdar jî didome. Tayîp Temel anî ziman ku çerçoveya konferansê êdî diyar e û wiha axivî: “Ji Belçîkayê hiqûqnasekî navdar Georges Dallemagne tê. Noam Peach jî li ser aştî û sekinandina şer û li ser hiqûq û azadiyê fikir û remanên wî yên berfireh hene, ew jî tê beşdar dibe. Gelek hiqûqnasên navdar tên. Loura Boldrini jî zelal bû ye ew jî dê were. Hiqûqnasekî marksîst John Holiwy ku xwedî berhemên girîng in jî tê. Ji herêma Baskê Îgor Zulakia tê. Weke tê zanîn li Baskê pêvajoya aştiyê gelek caran bi astengiyan re rû bir û ma, ji bo serpêhatiya Baskê pir girîng e, ew jî dê j bo vê mijarê were. Peyama birêz Abdullah Ocalan jî wê ji aliyê Veysî Aktaş ve bê xwendin. Mabesta me ya konferansê ew kue me û beşdarên konferansê tîne cem hev. Ev konferans dê bi nevarok û beşdarên xwe bandor li ser pêvajoya ‘Aştî û Civaka Demokratîk’ ku li Kurdistanê û Tirkiyeyê hatiye destpêkirin bike. Encamnameyek jî dê ji bo konferansê bê nivîsandin. Ev encamname jî wê xebatên qada navneteweyî û çerçoveya xebatên dîplomatîk diyar bike.”
Li bendê ye ku Îlham Ehmed jî beşdarî konferansê bibe
Tayîp Temel da zanîn ku ew di nava hewldan û xebatê de ne ku Hevseroka Daîreya Têkiliyên Derve ya Rêveberiya Xweser a Bakur û Rojhilatê Sûriyeyê Îlham Ehmed jî bê beşdarî konferansê bibe û axaftina xwe wiha domand: “Heke şert û mercên wê pêk werin dê Îlham Ehmed li ser navê Rêveberiya Xweser a li Rojavayê Kurdistanê tev li konferansê bibe. Lê hekeku astengiyên hiqûqî ji holê bên rakirin. Lê heke nekaribe were li vir beşdar bibe jî dê peymak bişîne an jî bi telekonferansê beşdar bibe. Gelek kes û kesayetên navdar ku em niha navê wan eşkere nakin jî dê bi rêya telekonferansê beşdar bibin.”
‘Ev konferans ji bo qada navneteweyî jî derfetan ava bike’
Tayîp Temel destnîşan kir ku piştî konferansê jî xebatên wan dê bidomin û axaftina xwe wiha bi dawî kir: “Xebateke enternesyonal hatiye destpêkirin. Bingeha vê xebatê ew e ku fikir û rêmanên Rêber Ocalan, em ji nû ve pênasekirina marksîzmê û şîroveya sosyalîzmê li hemû cîhanê bê ka çawa rastî eleqeyek mezin tê. Sosyalîzm bi têkçûyîna sosyalîzma real re ket nava krîzê. Krîzek navxweyî. Kapîtalîzmê jî êrişeke mezin li ser hemû civakên dinyayê meşand. Berxwedan û sekna sosyalîstan li dijî vê yekê, hewceyî pesndayînê ye lê teoriya sosyalîstan ji aliyê birêz Ocalan ve ji nû ve tê şîrovekirin. Teoriya çînî, teoriya dewlet û netew dewletan jî ji nû ve dinirxîne. Ev konferans wê derfetê ji bo qada navneteweyî ji fikir û remanên birêz Ocalan agahdar bibe û derxe holê. Jixwe eleqeyek mezin jî heye. Ez bawerim di demên pêş de li qada navneteweyî wê xebateke mezin a entarnasyonal bê lidarxistin. Em ê ji qada navneteweyî bang li Tirkiyeyê dikin û vê fikir û remanan birêz Ocalan agahdar bibin û zemîna pêşeroja enternasyonal xurt bibe. Xebatên dîplomatîk û navneteweyî bi encamnameya vê konferansê dê xurttir bibe. Banga me ew e kesayetên ku me vexwendine an venexwendine, yên ku van kesayetên navdar nas dikin, fikir û remanên wan meraq dikin di 6-7ê Kanûnê de li konferansê bin. Em dixwazin kesên konferansê bişopînin û beşdar bibin sûdê ji van nirxandin û werbigirin.”
