TJAyê Emîne Erciyes, Zîn Zagros û Ekîn Amara Toldar ku di 20ê Nîsana 2020an de li herêma Garê di encama êrişa dewleta tirk de jiyana xwe ji dest dabûn, bi bîr anî.
Tevgera Jinên Azad (TJA) endamên YJA Starê Nazli Taspinar (Emîne Erciyes), Leyla Acar (Zîn Zagros) û Şehriban Akin (Ekîn Amara Toldar) ku di 20ê Nîsana 2020an de li herêma Garê di encama êrişa dewleta Tirk de jiyana xwe ji dest dabûn, li avahiya DEM Partiyê ya Wanê bi bîr anî. Di bîranînê de wêneyên jinên jiyana xwe ji dest dane hatin daliqandin. Meclîsa Dayikên Aştiyê, Meclîsa Ciwanan a DEM Partiyê û gelek welatî tev li bîranînê bûn.
‘Hevalên jin li ser xeta jinê kedeke bêhempa dane’
Bîranîn bi deqeyekê rêzgirtinê dest pê kir. Piştre hevseroka MEBYA-DERê Hanim Kaya axivî û bal kişand ser pêşengiya jinê. Hanim Kaya, destnîşan kir ku bîranîna endamên YJA Starê ji bo wan giraniyeke mezin e û got: “Emîne heval fermandareke rêxistinê bû û li Nevşehîrê di nava malbeteke tirk de hatiye dinê. PKK tenê mafê Kurdan naparêze, mafê hemû gelên bindest diparêze û hevala Emîne jî li ser vê esasê tev li dibe. Hevalên jin li ser xeta jinê kedeke bêhempa dane û niha jî yên li qadan li ber xwe didin jin in. Em di şexsên van hevalan de hemû cangoriyan bi bîr tînin.”
‘Hêvî dikim ev pêvajo bibe vesileya aştiyê’
Piştre li ser navê TJAyê hevseroka DEM Partiyê ya Wanê Gulşen Kurt axivî û bal kişand ser pêvajoya “Aştî û Civaka Demokratîk”. Gulşen Kurtê anî ziman ku hêviya wan ew e ku ev pêvajoya Rêberê Gelê Kurd Abdullah Ocalan daye destpêkirin, bibe vesileya aştiyê û bi bîr xist ku ew dê ji bo careke din ti ciwan jiyana xwe ji dest nedin têbikoşin.
Herî dawî sînevîzyona ku behsa Emîne Erciyes dikir hat temaşekirin û bîranîn bi dawî bû.
