Donald Trump têkildarî êrişên Îsraîlê yên li ser Îranê daxuyaniyek nû da û got: “Di halê hazir de mirin û hilweşîneke mezin rû da, lê belê ji bo bidawîbûna vê komkujiyê hîn dem heye. Êrişên bê yên tên plankirin wê hîn bêrehm bin.”
Serokê DYAyê Donald Trump têkildarî êrişên Îsraîlê yên li ser Îranê li ser platforma Truht Social daxuyaniyek nû belav kir.
Di daxuyaniya xwe de Donald Trump diyar kir ku wê êriş ‘bêrehmtir’ berdewam bikin û got: “Ji bo bi Îranê re lihevkirin bê kirin min şens li ser hev da wan. Bi gotinên herî xurt min ji wan re got, ‘tenê bikin’, lê belê çiqasî hewl dan jî nekarîn vê bi ser bixînin. Min ji wan re got, ku ev yek ji texmînên wan hîn bêhtir wê xerab be, DYA li her devera cîhanê cebilxaneyên herî baş û kujer ên mirinê hildiberîne û Îsraîl xwedî vane û dizane wê çawa bi kar bîne.”
Trump gefên tund xwar û got: “Hin alîgirên tundiyê yên Îranî bi wêrekî axivîn, lê belê nizanîbûn ka wê çi biqewime. Niha hemû mirin û rewş wê hîn bêhtir nebaş bibe. Di halê hazir de gelek mirin û hilweşîneke mezin rû da, lê ji bo bidawîkirina vê komkujiyê hîn dem heye, êrişên bê yên têne plankirin wê hîn bêhtir bêrehm bin.”
Donald Trump cara dawî bang li Îranê kir û wiha axivî: “Îran beriya ku tiştek ji ber nemîne divê li hev bike û tişta ku berê jê re Împaratoriya Îranê dihate gotin, rizgar bike. Ne hîn bêhtir mirin, ne hîn bêhtir hilweşîn, bêyî dereng bikeve bikin. Bila Xweda we biparêze.”
