Serokê Amerikayê Donald Trump di balafira Air Force One yê de ji rojnamegeran re axivî û got: “Beriya ku em bi Îranê re dest bi muzakereyê bikin divê em bikevin nava hewildanê.
Xwepêşandanên li Îranê ket hefteya sêyemîn û her diçe geş û gur dibe. Serokê Amerikayê Donald Trump di balafira Serokomariyê ya Amerîkayê de ji rojnamegeran re axivî. Serokê Amerikayê Donald Trump da zanîn ku Îranê di 11ê Çileya 2026an de ji Amerîkayê re ragihandiye ku ew amade ye careke din vegere ser muzakereyên ji bo projeya nukleerî ya Îranê. Donald Trump destnîşan kir ku Îran ji ber zextên Amerîkayê bêzar bûye û ew van daxwazen dipejirîne. Donald Trump diyar kir ku divê ew ji bo muzakereyên bi Îranê re bikevin nava hewildanan.
‘Tiştên li Îranê diqewimin pir cidî ne’
Donald Trump bi lêv kir ku tiştên li Îranê diqewimin pir cidî ne û ew geşedanan ji nêz ve dişopînin. Donald Trump da zanîn ku derbarê Îranê de di serê her saetê de agahî tên ber destên wî û anî ziman ku ji bo vê meseleyê çend vebijêrkên wan hene û divê biryarekê bidin.
‘Bersiva me dê Îranê matmayî bihêle’
Donald Trump diyar kir ku Îran li heremê êrişî wan bike dê bersiva wan Îranê matmayî bihêle û bi lêv kir ku di destê wan de ji bo vê çend vebijêrkên ciddî hene. Donald Trump anî ziman ku beriya ku ew dest bi muzakereyan bikin dibe ku pêwîstî bi liv û hewldaneke din hebe.
Xeta sor jî derbas bû
Dû re rojnamegeran pirsa “Îranê xeta we ya sor derbas kir an na?” ji Donald Trump kir. Trump jî ev bersiv da rojnamegeran: “Li gorî rewşa ku dixuye xeta min a sor derbas dikin. Em pir li ser mijarê disekinin û artêşa me jî mijarê ji pir aliyan ve lêkolîn dike. Em ê biryarek bidin.”
