TUHAY-DERa Wanê ji bo kesên ku piştî Newrozê hatine girtin daxuyaniyek da û got: “Ev cûre pêkanîn digihêjin astên îşkenceyê û bi awayekî cidî zirarê didin pêvajoyên aştî û civaka demokratîk.”
TUHAY-DERa Wanê ji bo kesên piştî pîrozbahiyên Newrozê hatine girtin li Qada Bajêr a Wanê daxuyaniyek da. Hevseroka DEM Partiyê ya Wanê Gulşen Kurt, Heserokê DBPê yê Wanê Cemal Demîr, Hevşaredarê Bajar ê Mezin ê Wanê Abdullah Zeydan, Dayikên Aştiyê, MEBYA-DER û gelek rêxistinên sivîl û civakî tev li daxuyaniyê bûn. Daxuyanî ji aliyê rêveberê TUHAY-DERê Hakan Bîlekçî ve hate xwendin.
‘Ev nêzikatî awayekî cidî zirarê didin pêvajoyên aştî û civaka demokratîk’
Hakan Bîlekçî da zanin ku Newroza 2026an, ji tenê cejneke asayî wêdetir, qonaxeke dîrokî ye ku gel daxwazên xwe yên azadî, piştevanî û wekheviyê tînin ziman û wiha got: “Ev cejn hem nirxekî neteweyî ye, hem mizgîniya biharê ye û hem jî şahiyeke ku azadiya bindestan sembolîze dike ye. Ew, pîrozbahiyeke xwedî wateyeke siyasî û civakî ya xurt e ku piştgirî û azadiya hemû gelên Rojhilata Navîn îfade dike. Lê mixabin, di vê pêvajoya watedar de, coş û tevlîbûna gel bi nêzîkatiyên neyînî û zordar hatine sîberkirin. Bi serdegirtinên malan ên ku nîvê şevê yan jî berê sibê hatine kirin, bi sedan kes hatine binçavkirin, mal hatine talankirin, kelûpel hatine serûbinkirin û miameleyên dijmirovî hatine kirin. Ev cure pêkanîn, dighêjin astên îşkenceyê û bi awayekî cidî zirarê didin pêvajoyên aştî û civaka demokratîk.”
‘Divê rayedar demildest gavên berbiçav biavêjin’
Bîlekçî anî ziman ku ew dixwazin ku di vê demê de girtîgeh werin valakirin û hemû girtiyên siyasî demildest werin berdan û wiha pê de çû: “ Berdewamiya van pêkanînan, hesta aştî û ewlehiyê ya civakê dihejîne û fikarên li ser pêvajoyê kûrtir dike. Ev nêzîkatiya zordar, xwedî taybetmendiyeke wisa ye ku rê li ber beşdariya gel a ji bo pêvajoyê digire. Wekî saziyên ku nûnertiya gel û hemû beşên civakê dikin, em bawer dikin ku divê li dijî van pêkanînên neyînî nerazîbûneke xurt werê nîşandan. Ji bo ku pêvajo bi awayekî saxlem bi pêş bikeve, divê rayedar demildest gavên berbiçav biavêjin û di çarçoveya pîvanên gerdûnî yên hiqûqê de, hemû girtiyên siyasî serbest werin berdan.
‘Divê dawî li pêkanînên zordarî were’
Bîlekçî di dawiyê de da zanîn ku ev cure pêkanîn dê ne ji bo civaka Tirk û ne jî ji bo civaka Kurd tu feydeyê peyda nekin û wiha bi dawi kir: “Heta ku gavên ji bo xurtkirina vîna gelan a ji bo jiyana bi hev re û di nav aştiyê de neyên avêtin, dê fikar û bêbawerî di nav civakê de her ku biçe zêdetir bibe. Ji bo parastina aştiya civakî, azadiya gelan û hesta ewlehiyê ya malbatan; em careke din bi dengekî bilind daxwaz dikin ku dawî li pêkanînên zordar werê anîn, bi taybetî ciwanên ku hatine girtin demildest werin berdan û edalet werê pêk anîn.”
Daxuyanî bi dirûşmeyên ‘Bijî berxwedana zindanan’ bi dawî bû.
