Wêneyekî ku ji aliyê wênegirê Kurd Mehmet Masum Suer ve di çalakiya TJAyê hatibû kişandin, ji bo koleksîyona rêxistina navneteweyî Global 50/50, ku li cîhanê ji bo wekheviya zayendî têdikoşe, hate qebûlkirin û li ser malpera rêxistinê hate weşandin.
Wêneyekî ku ji aliyê wênegirê Kurd Mehmet Masum Suer ve di meha Gulanê ya borî de li Amedê di çalakiya “Aştiya Civakî û Çareseriya Demokratîk” de ku ji aliyê Tevgera Jinên Azad (TJA) ve hatibû organîzekirin, hatibû kişandin, di koleksîyona Global 50/50 de cih girt û li ser malpera rêxistinê hate weşandin. Di wêne de Hevseroka Giştî ya Partiya Wekhevî û Demokrasiyê ya Gelan (DEM Partî) Tulay Hatîmogûllari diaxive û li dora wê jinên Kurd ku bi tilîyen xwe nîşana serkeftinê rakirin e, xuya dikin.
Wêneyê Suer, di bin sernavê “Têkoşîna Jinên Kurd a ji bo Aştiyê û Azadiyê” û di beşa “Qanûn û Edaletê” de cih girt. Wêne dê ji aliyê Global 50/50 û rêxistin û saziyên mafên mirovan ên navneteweyî yên din û ji aliyê çapemeniya cîhanê jî di rapor, lêkolîn û nûçeyan de wê bê bikaranîn.
Bawerî û serbilindiya kolektîf a jinan
Wêneyê Suer ji aliyê Global 50/50 ve bi vê daxuyaniya li jêr li koleksiyonê hate zêdekirin:
“Hevseroka Giştî ya Partiya Wekhevî û Demokrasiyê ya Gelan (DEM Partî) Tulay Hatîmogûllari bi serbilindî li pêşberî girseya ku ji aliyê jinên Kurd ve hatiye dorpêçkirin û pankart di destê wan de ne û nîşanên serketinê çêdikin, diaxive. Rûyê wan bawerî û serbilindiya kolektîf nîşan dide. Ev wêne kêliyek girîng di tevgera aştî û azadiyê ya jinên Kurd a li Tirkiyeyê de nîşan dide. Piştî çil salan şerê çekdarî di navbera artêşa Tirk û Partiya Karkerên Kurdistanê (PKK) de, bi banga bêçekbûnê û hevdîtinên aşîtiyê ya Rêberê PKKê Abdullah Ocalan dest pê kir. Li Amedê, jinên Kurd ji bo piştgiriya vê pêvajoyê hatin cem hev û daxwaza demokrasî, wekhevî û bidawîanîna tundîtûjiyê kirin. Hevserokatiya Hatîmogûllari rola veguherîner a jinên Kurd di lêgerîna aştiyê de temsîl dike. Aktîvîzma wan hem zilma baviksalar û hem jî ya dewletê dixe ber pirsê û diyar dike ku têkoşîna ji bo edaletê ji têkoşîna ji bo wekheviya zayendî nayê veqetandin.”
Rêxistina civaka sivîl Global 50/50 a ku navenda wê li Brîtanyayê ye, 30 sal in li ser asta navneteweyî ji bo wekheviya zayendî, piştgiriya serokatiya jinan û polîtîkayên tenduristiyê ku ji bo her kesi dixebitin xurt bike lêkolîn, rapor û nûçeyan amade dika û belav dike.
