Wezîrê Dadê Yilmaz Tûnç bersiv da daxwaza Rêberê Gelê Kurd Abdullah Ocalan a ji bo hevdîtina bi rojnameger û siyasetmedaran re û got: “Di çarçoveya qanûnî de ya pêwîst dikare bê kirin.”
Piştî daxwaza DEM Partiyê ya ji bo hevdîtina Rêberê Gelê Kurd Abdullah Ocalan a bi rojnameger, kesayet û siyasetmedaran re Wezîrê Dadê daxuyanî da.
Wezîrê Dadê Yilmaz Tûnç got: “Rê û rêbazên hevdîtina bi hikumxwarên li girtîgehan re, di qanûnan de hene. Di çarçoveya qanûnî de ya pêwîst dikare bê kirin.”
Heyeta Îmraliyê ya DEM Partiyê 24ê Nîsanê di hevdîtina bi Wezîrê Dadê Yilmaz Tûnç re xwestibû, astengiya li pêşiya hevdîtina Abdullah Ocalan a bi rojnameger û siyasetmedaran re bê kirin.
‘Mafê hêviyê’
Wezîrê Dadê ji bo pirseke li ser “mafê hêviyê” jî wiha bersivand: “Rewşeke bi vî rengî, hevdîtin jî nîn e.”
Dogan bertek nîşan da
Li ser vê yekê Berdevka DEM Partiyê Ayşegul Dogan li ser hesabê xwe yê Xê nerazîbûn nîşanî Yilmaz Tunç da û got: “Birêz Wezîr dûrî ji nîqaşên mafê hêviyê, zimanê we dûrî zimanê çêker ê vê pêvajoyê ye, mixabin bandoreke jehrî diafirîne. Weke civak bendewariya me ew e ku hûn hêza xwe ji bo avakirina edaletê bi kar bînin. Pêwîstiya me bi hiqûq û lihevkirina demokratîk heye, ne bi polemîkê.”
