Serokê Olî yê Îranê Elî Xamaney angaşt kir ku hin serhildêr ji bo xwe li ber Amerîkayê şîrîn bikin avahiya Hikûmetê ya Tehranê şewitandine. Xemaney di axaftina xwe de Trump jî wekî kesek qûre pênase kir û anî ziman ku gelek kesên mîna wî di dema xwe ya herî bi hêz de dîtine, têk çûne.
Serokê Olî yê Îranê Elî Xemaney derbarê serhildanên gelên Îranê ku di roja 13emîn de berdewam dike, daxuyanî da. Xamaney cardin gelên mafên xwe dixwazin sûcdar kir û wiha got: “Şevê din li Tehranê komek serhildêran tenê ji bo xwe li ber dilê Amerîkayê şirîn bikin, saziyek dewletê şewitandin. Divê Îrani yekîtiya xwe ava biparêzin. Divê her kes bizanibe ku Îran li ser xwîna bi sed hezaran şehîdan hatiye avakirin. Îran dê destûr nede kesên bi pere li dijî Îranê dixebitin.”
‘Gelek ên wekî Trump ketin’
Xemaney ku berxwedana gelan bi tiliyên derveyî re girêda, bersiv da Serokdewletê DYAyê Donald Trump jî. Xamaney, Trump wekî kesek qûre pênase kir û got: “Ew kesê li cihê xwe rûniştî û bi pozbilindî dixwaze cîhanê bi rê ve bibe, divê bizanibe ku gelek zalimên wekî Fîravûn, Nemrût, Riza Xan û Muhammed Riza di dema xwe ya herî zêde xurt hîs kirin de têk çûn.”
