Rêxistina DEM Partiyê ya navçeya Elkê û welatiyên gundê Geliyê Gewda daxwaz kirin ku Germava Elkê ku di sala 2020an de hatiye çêkirin, were vekirin.
Rêxistina Partiya Wekhevî û Demokrasiyê ya Gelan (DEM Partî) a Navçeya Elkê ya Şirnexê bi şeniyên gundê Geliyê Gewda yê navçeya Elkê ya Şirnexê re bi daxwaza Germava Elkê ya ku di sala 2020an de hatibû çêkirin lê nehatiye vekirin daxuyanî da. Endam û nûnerên Rêxistina DEM Partiyê yên Şirnex û navçeya Elkê, şeniyên gundê Geliyê Gewda û parlamenterê DEM Partî Mehmet Zekî Îrmez tev li daxuyaniyê bûn.
Metna daxuyaniyê ji aliyê endamê Meclisa Şaredariya Elkê yê DEM Partiyê Erkan Dûrmûş vê hat xwendin. Erkan Dûrmûş diyar kir ku tevî ku Germava Elkê di sala 2020an de hatiyê çêkirin û inşata wê qediyaye jî nehatiye vekirin. Erkan Dûrmûş anî ziman ku Germav di heman demê de ji bo tenduristî û debara mirovên Elkê çavkanî ye û wiha got: “Lê Mixabin gumanê me hene ku ev tesîs ji ber sedemên siyasî û rantê ji welatiyan re nehatiye vekirin. Em li vir dibêjin em ê destûr nedin ku li herêma me dar bên birin û çavkaniyên me yên avê ji bo rantê bên tunekirin. Em bi saziyên sivîl û welatiyên Elkê ve dibêjin ku divê êdî ew germav be vekirin û bikeve xizmeta welatiyan. Ji ber wê jî em bang li rêyedar û berpirsan dikin ku demildest ji bo vê banga me gavekê biavêjin û bersivê bidin.”
‘Bila germav vebe û di xizmeta gel de be’
Piştre jî parlamenterê DEM Partî yê Şirnexê Mehmet Zekî Îrmez axivî. Mehmet Zekî Îrmez jî anî ziman ku Germava Zumrutê ya Elkê heta 5 sal berê jî di xizmeta gel de bû û got: “Hem ji aliyê tenduristiyê ve hem jî ji aliyê aboriya navçeyê ve weke çavkaniyekê bû. Lê piştî di sala 2020an de nezî 5 milyon lîre li serê hat xerckirin lê ji wê salê ve biryarek hat standin û gotin em ê vir bifiroşin. Ji bo hevkarên hikûmetê jê sûdê werbigirin ev der firotin. Em jî niha dinêrin tevî ku ji sedî 70ê înşata wê qediyaye jî venakin. Gel jî bertek nîşan da ku weke berê di xizmeta gel de be. Nêzî 2 sal in jî tu kar û xebat li vir nayê kirin. Tu xizmetê ji gel re nake. Gelê me jî di wê hêviyê de ye ku înşat biqede û gel jî weke berê sûdê jê werbigire. Banga me li Midûriyeta Bajarvaniyê ya Şirnexê ye. Ev du sal in, çima hûn bêdeng in? Bi taybetî em ji Walîtiya Şirnexê re jî dibêjin bila were vir bibînin û demildest biqedînin û dîsa bikin xizmeta gel.”
