Şirnex – Havîn Tektaş di 24ê Kanûne de bi awayekî biguman li Îzmîrê jiyana xwe ji dest da. Lê malbata Havîn Tektaş ji hevjînê wê yê çawişê pispor Îbrahim Tektaş bi guman in û diyar dikin ku xwekuştina Havînê ne pêkan e.
Jina bi navê Havîn Tektaş(25) ku li Îzmîrê dijî di 24ê Kanûnê de bi awayekî biguman jiyana xwe ji dest da. Havîn Tektaş ji navçeya Elkê ya Şirnexê ye. 4 sal berê bi çawişê pispor Îbrahim Tektaş re zewicî. Pitika wê ya bi şîr heye. Piştî ku zewicî mala xwe bir Îzmîrê û li Îzmîrê bi cih û war bû. Di 24ê Kanûnê de agahî gihişt malbatê û gotin ‘Keça we xwe bi desmalekê bi deriyê odeyê ve daliqandiye.’ Havîn Tektaş piştî bi awayekî biguman jiyana xwe ji dest da, cenazeyê wê şandin nexweşxaneyê û otopsî kirin. Piştî otopsiyê cenaze birin malbata dayik û bavê wê Elkê. Lê hevjînê we Îbrahim Tektaş bi cenaze re nehat. Malbat ji hevjînê wê Îbrahîm Tektaş bi guman e ku wî keça wan kuştiye.
Malbatê piştî bûyerê serî li dozgeriyê dan û der barê Îbrahim Tektaş de gilî kirin ku lêpirsîn bê destpêkirin. Malbata Havîn Tektaş ku li gundê Tivor a Elkê dijî, têkildarî bûyerê ji Ajansa Welat re axivîn û xwestin bûyer bê ronîkirin û Îbrahim Tektaş bê cezakirin.
‘Em bi guman in ku Îbrahîm Tektaş keça me kuştiye’
Dayika Havîn Tektaş, Hatice Aşkan diyar kir ku ew ji ber mirina keça xwe bi guman in û got: “Pitikê wê yê bi şîr heye. Wê çawa xwe bixeniqîne. Keça min xwe ne xeniqandî ye. Tiştek bi serê keça min hatiye. Me li Dozgeriya Şirnexê gilî kir. Ez bi guman im ku Îbrahîm Tektaş keça min kuştiye. Îbrahîm Tektaş bi cenaze re nehat. Hem gotin keça we xwe bi derî ve daliqandiyê, hem jî bi cenaze re nehat. Ev gumanên me zede dike. Em bawer nakin ku keça me xwe daliqandibe.”
‘Bila bûyer bê ronî kirin’
Hatice Aşkan destnîşan kir ku xwesteka wan ew e ku bûyer bê ronîkirin û bi lêv kir: “Em dixwazin ku bûyer bê zelalkirin. Heke wî kuştibe bila bêcezakirin. Em ê heta dawiyê li pey doza keça xwe bin. Me çend caran ji keça xwe re got tu pirsgirêkên te hene got na. Ku pirsgirêkê wê tune be çima xwe bikuje. Bila lêpirsîn bê destpêkirin. Heke wî nekuştibe bila bê ronîkirin em jî bizanin. Lê heke wî kuşti be jî bila bê cezakirin.”
Bav Mûstafa Aşkan jî diyar kir ku keça wî ne keseke ku xwe bixeniqîne bû û wiha got: “Keça min pir baş bû. Ne jineke ku xwe bixeniqe bû. Em bawer nakin ku xwe xeniqandibe. Pitikê wê hebû. Çima xwe bixeniqîne. Bejna keça min bi qasî derî ye. Dê çawa xwe bi derî ve daliqîne. Me gilî kiriye. Em dixwazin rastî ronî bibe û kujer bê cezakirin. Em ji Îbrahîm bi guman in. Ez ê heta dawî dozê bişopînim.”
