26 bajar dê ji bo azadiya Rêberê PKKê Abdullah Ocalan meşên dirêj li dar bixin. Girse dê li bajarê Strasbourgê bigêjin hev.
Di çarçoveya pêngava “Ji Abdullah Ocalan re zadî, ji pirsgirêka kurd re çaresriya siyasî” de dê li 26 bajaran meşên girkeyî bêne lidarxistin. Meş wê di 21ê çileyê li Fransayê dest pêbikin û di 15ê Sibatê li bajarê Strasbourgê bi dawî bibin. Meşa Dirêj wê weke temsîlkirina 26 salên rehîngirtina Abdullah Ocalan li 26 bajaran, 26 rojan û bi 26 beşdarvanan were lidarxistin.
Komîteya Fransayê ya pêngava “Ji Abdullah Ocalan re azadî, ji pirsgirêk kurd re çareseriya siyasî” têkildarî mijarê daxuyanî da. Daxuyanî wiha ye:
“Pêngava Azadiyê ya ‘Ji Abdullah Ocalan re azadî, ji pirsgirêka Kurd re çareseriya siyasî’ di sala xwe 2’yemîn de gihîşt merheleyeke diyar. Destpêkirina Pêngava Azadiyê di sala 2024’an de bi temsîlkirina rehîngirtina Rêbertiya me ya 25 salan, me li Fransayê bi 25 beşdarvanan, li 25 qadên cuda û meşeke 25 rojan li dar xist. Bi lidarxistina meşan di serî de gelê me saziyên me, bi armanca mezinkirina pêngavê û bidestxistina encamê îradeyek nîşan da. Qonaxa îro, qonaxa encamstandinê ye. Girêdayî vê yekê em ê îsal jî li Fransayê weke temsîlkirina 26 salên rehîngirtina Rêber Apo li 26 bajaran, 26 rojan û bi 26 beşdarvanan bi şîara ‘Azadî ji Rêber Apo re, çareserî ji pirsgirêka Kurd re’ di navbera 21’ê Çileyê û 15’ê Sibatê de meşên dirêj li dar bixin.
Em ê di pêvajoya meşan de bi gelan re hevdîtinan pêk bînin û li gel dostên xwe pêngavê bigihînin asteke jortir.
Rêber Apo di sala 1999’an de bi Komployeke Navneteweyî ji dewleta Tirk a faşîste re hate teslîmkirin. Rêber Apo çavkaniya felsefeya YPJ, YPG û ‘Jin, Jiyan, Azadî’ye ku hovitiya DAÎŞ’ê ya bi serê cîhanê bûbû bela têk birin. Em ê bi çalakiyên xwe pergala êşkence-qirkirinê ya Îmraliyê eşkere bikin û bi paradîgmaya civaka demokratîk, okolojîk û azadiya jinan esas digire ya Rêber Apo, em ê ji dostên xwe re heqîqeta Rêbertiya xwe ya di serî de Kurdistan û gelên Rojhilata Navîn û ji hemû gelên bindest re bûye hêviya jiyana azad vebêjin. Bi çalakiyên xwe yên weke seredanên ji bo sazî û malbatan, civînên gel û hwd. em ê bi gelê xwe û gelan re hevdîtinan pêk bînin. Meşa me wê 15’ê Çileyê li Strasbourgê bi lidarxistina mîtîng û meşeke mezin bi dawî bibe.
Pêvajoya dîrokî ya ku em têde ne, di serî de esareta Rêbertiya me û êrîşên qirkirinê yên li ser Rojava pêvajoya dagirkirin û ilheqkirina hemû Kurdistanê ye. Li hemberî ferzkirinên qirkirinê yên 100 salan beriya niha, em bang li hemû gelê xwe û dostên xwe dikin ku xwedî li meşa me derkevin û di Sibata 2025’an de li Strasbourgê beşdarî Meşa Dirêj bibin.”
