Amed – Şêniyên Zozanê Hesendînê ku li dijî kanên madanê di çalakiya nobedê de ne, diyar kirin ku ew ê heta dawiyê li vir bin û li diji talankirina xwezayê li ber xwe bidin.
Zozanê Hesendînê ya Pasûra Amedê bi destê şîrketên madenê tê talankirin. Şîrketa Anonîm a Bazirganiya Derve û Kanzakariyê ya Pasûrê ji bo lêgerina kanzayan bi awayekî bêhûqîqî dest bi lêgerina madanê dike. Şêniyên Zozanê Hesendînê dest bi çalakiya nobedê kirin. Kesên ku dixwazin xwezaya xwe biparêzin ji Ajansa Welat (AW) re axivîn.
‘Heta dawiyê dê têkoşîna me berdewam bike’
Welatî Mehmet Salîh Toprak diyar kir ku 79 sal in li Zozanê Hesedînê dijî û wiha axivî: “Ew erd erdê bav û kalê me ne. Îro tê xwestin li vir kanên madanê bên vekirin. Dema kanên madenê bên vekirin dê avame zuha bibe. Av zuha bibe, em em ê nikaribin sewalkariyê bikin. Li Zozanê Hesendînê pêşiyên me sewalkarî dikirin. Îro em nekarin sewalkariyê bikin. Em nekaribin sewalkariyê bikin, em ê nikaribin debara xwe bikin. Ji bo parastina zozanê Hesendînê dê têkoşîna me bidome.”
‘Rapora şîrketê tune ye’
Welatî Burhan Baran jî da zanîn ku ew ji bo Zozanê Hesendînê ji Stenbolê hatiye û got: “Ew Zozan çavkaniya jiyana me û ajalên me ye. Dema ev kanên madenê bên vekirin em ê li vir perîşan bibin. Em li vir di çalakiya nobedê de ne. Em dixwazin ku tevahî gelê me bêne vir û beşdarî çalakiyê bibin. Madena Mehmet Eren ê li gundê Dimiliyan bê rapor e. Rapora şîrketê tune ye. Dewlet li pişt wan e. Tiştê ji destê me bê em ê bikin. Ev rojên xîretê ye. Heta talan berdewam bike em ê li vir li ber xwe bidin.”
‘Kanên madenê dê sewalkariyê tune bike’
Welatî Nedîm Emre jî destnîşan kir ku ew ji gundê Şîrnasê ye û got: “Hesendîn di nava 6 gunda de ye. Mehmet Eren ji Stenbolê hatiye vir. Zozanê Hesendînê heta Çiyayê Andokê biriye li ser navê xwe û Zozanê me firoştiye. 60 sal in ez li vir dijîm. Ji bo vê Zozanê gelek berdel hatine dayîn. Em dest ji Zozanê xwe bernadin. Dema madan were li vir mêşvanî û sewalkarî jî dê tune bibe.”
‘Armanc lêgerîna kanên madanê ye’
Welatî Îskan Çîçek bi bîr xist ku ew ji bo berxwedana Zozanê hatiye vir û got: “Ew Zozan her tiştê me ye. Em debara xwe bi vê Zozanê dikin. Bi şev û roj em li vir in. Em rê li pêş van kanan negirin, dê heta Çiyayê Andokê belav bibe. Ewil li Hesendînê dest bi lêgerênê kirin. Dibêjin em ê qerekolê çêkin. Lê armanc lêgerîna kanên madanê ye. Em bên kuştin jî em ê li dijî vê yekê li ber xwe bidin.”
