Danişîna doza rojnameger Esra Solîn Dal, Mehmet Aslan û Erdogan Alayumat bi daxwaza “temamkirina xisûsên di dosyayê de” hate taloqkirin. Rojnameger Ahmet Guneş jî ji doza xwe beraet kir. Biryara qedexekirina derve ya Rojnameger Abdurrahman Gok jî nehat rakirin.
Li Amed û Stenbolê 5 rojnameger hatin darizandin. Li Amedê danişîna doza Rojnameger Abdurrahman Gok û li Stenbolê jî danişîna Esra Solîn Dal, Mehmet Aslan, Erdogan Alayumat û Ahmet Guneş pêk hat.
Danişîna 4emîn a doza nûçegihanên Ajansa Mezopotamyayê (MA) Esra Solîn Dal û Mehmet Aslan û rojnameger Erdogan Alayumat ku bi îdiaya “endamtiya rêxistinê” tên darizandin, li 25emîn Dadgeha Cezayên Giran a Stenbolê hate lidarxistin. Rojnameger tev li danişînê nebûn lê parêzer Şukru Alpsoy, Habat Demîrcan û ji Yekîneya Hiqûqê ya Komeleya Medya û Xebatên Hiqûqê (MLSA) Hazal Surmelî di danişînê de amade bûn. Parêzerên rojnamegeran, xwestin kêmasiyên di dosyayê de bên temamkirin.
Dadgehê, biryar da ku ji Serdozgeriya Komarê ya Stenbolê re muzekere were nivîsandin û aqûbeta dosyayên der heqê Alayumat û Aslan de bê zelalkirin. Danişîn, taloqî 20’ê Mijdarê hate kirin.
Rojnameger Ahmet Guneş beraet kir
Danişîna 2yemîn a doza rojnameger Ahmet Guneş ku bi îdiaya “endamtiya rêxistinê” tê darizandin, li 25emîn Dadgeha Cezayên Giran a Stenbolê hat lidarxistin. Guneş û parêzera wî di danişînê de amade bûn. Guneş, diyar kir ku ew rojnamegere û ev tişt anî ziman: “Ji ber pîşeya xwe hatim girtin û têm darizandin. Rojnamegerî sûc nîne, daxwaza beraeta xwe dikim.”
Parêzera Guneş, Meltem Ozel jî diyar kir ku miwekîlê wê rojnamegere û xebatên rojnamegeriyê weke sûc hatine nîşandan. Meltem Ozelê daxwaza beraeta miwekîlê xwe kir. Dadgehê, ji bo rojnameger Guneş biryara beraetê da.
Biryara qedexeya dervê welat a Abdurrahman Gok ranekirin
Danişîna 8emîn a doza rojnameger Abdurrahman Gok ku ji ber xebatên xwe yên pîşeyî û îdiayên îtîrafkar Umît Akbiyik bi îdiayên “endamtiya rêxistinê” û “propagandaya rêxistinê” tê darizandin, li 5emîn Dadgeha Cezayên Giran a Amedê hat lidarxistin. Abdurrahman Gok û parêzerên wî Resûl Tamur û Mehmet Emîn Aktar di danişînê de amade bûn. Komeleya Rojnamegeran a Dîcle Firatê (DFG), Komeleya Medya û Xebatên Hiqûqê (MLSA) û hinek rojnamegeran jî danişîn şopandin.
Abdurrahman Gok, diyar kir ku ji ber biryara qedexeya derketina derveyî welat di cîbicîkirina pîşeya xwe de zehmetiyan dikişîne û got: “Carnan difikirim û dibêjim heke di girtîgehê de bûma dê baştir bûya. Qet nebûya dê min bigota ez di nava çar dîwaran de me. Hem li derve me û hem jî nikarim karê xwe bikim. Ev rewş rewşekî zehmet e.” Gok, xwest biryara qedexeyê were betalkirin.
Parêzer Tamur û Aktar jî daxwazên bi heman rengî kirin. Dozger jî mutalaaya xwe da û xwest heman tevdîra kontrola edlî bidome.
Abdurrahman Gok, got: “Beriya niha heta danişîna biryarê tev li danişînan bûm. Piştre doz hate vekirin û tev li hemû danişînên wê jî bûm. Ez li vir ji dayik bûm, li vir mezin bûm û karê xwe li vir dikim. Dixwazim biryara qedexeya derketina derveyî welat were betalkirin.”
Taloq kirin
Dadgehê, biryar da ku aqûbeta lêpirsîna ji hêla Serdozgeriya Komarê ya Amedê ve hatiye vekirin were pirsîn. Daxwaza rakirina biryara qedexeya derketina derveyî welat hate redkirin û dadgehê danişîn taloqî 25’ê Mijdarê kir.
Nûnerê Tirkiyeyê yê Rojnamegerên Sînornenas (RSF) Erol Onderoglû piştî danişînê axivî û ev tişt anî ziman: “Em dixwazin ku êdî zext li rojnamegerê hem li welat hem jî ji derveyî welat di şertên zehmet de agahî bi raya giştî re parve kirî û piştî kişandina dîmenên Kemal Kurt bi taybet hedef hatiye girtin, neyên kirin.”
