Rêxistina DEM Partiyê ya Germencik a Aydinê jinên şoreşger Sakîne Cansiz, Leyla Şaylemez û Fîdan Dogan ên li Parîsê û Fatma Ûyar, Sêvê Demîr û Pakîze Nayir ên li Silopiyayê hatibûn kuştin bi bîr anî.
Rêxistina DEM Partiyê ya Germencik a Aydinê ji bo jinên şoreşger Sakîne Cansiz, Leyla Şaylemez û Fîdan Dogan ku di 9ê Çileya 2013an de li Parîsê hatibûn kuştin û endama Meclîsa Partiyê ya DBPê Sêvê Demîr, endama Kongreya Jinên Azad (KJA) Fatma Ûyar û Hevseroka Meclîsa Gel a Silopiya Pakîze Nayir ku di 4ê Çileya 2016an de li Silopiyayê hatibûn kuştin li avahiya DEM Partiyê bernameya bîranînê li dar xist.
Bîranîn bi deqîqeyeke rêzgirtinê destpê kir. Piştî rêzgirtinê, Hevseroka DEM Partiyê ya Germencikê Eylem Uzumcuoglu axivî û anî ziman ku ew tenê ne nav in, ew remza têkoşîna gelekî ne û wiha axivî: “Ev êrîş ne tenê li dijî şeş jinan, li dijî hêza rêxistinkirî ya jinan û hêviya aştiyê hatiye kirin. Lê belê komkujî nikarin têkoşîna me biqedînin; berovajî wê, heqîqeta me mezintir dikin.”
Eylem Uzuncuoglu destnîşan kir ku her du komkujî jî di dîroka têkoşîna jinan de wekî birîneke kûr mane û heya îro jî edalet bi cih nehatiye û wiha pê de çû: “Ronîkirina van her du bûyeran berpirsiyariyeke mirovî û hiqûqî ye û heta ku kujer û hêzên li pişt van qetlîaman dernekevin pêşberî dadgehê, dê lêgerîna wan me ya edaletê berdewam bike.”
Bîranîn bi dirûşmeya “Jin, Jiyan, Azadî” û bi soza şopandina xeyalên şehîdan bi dawî bû.
