Îsraîlî eşkera kerd ke seba hewanayîşê talûkeyê ke vera Îsraîlî yê, Îranî ser o hêrişê hewayî kerd. Îranî zî hemverê naye de vengdayîşê cewabî kerd. Pêkewtişê mîyanê her di dewletan badê Şerê 12 Rojan fina resaye sewîyeya şerê konvensîyonelî.
Wezaretê Pawitişî yê Îsraîlî vat ke hedefê operasyonî astengkerdişê talûkeyan o ke şênê vera Îsraîlî virazîyê. Îsraîl programê nukleêrî û kapasîteyê fuzeyanê balîstîkîyan ê Îranî seba emnîyetê neteweyî talûkeyêko gird vîneno.
Tehran û dormeyanê bînan de vengê teqayîşan ameyê eşnawitene û bi desan hedefê stratejîkî û sazgehê dewlete ameyê hedefgirewtene. Xirabîya madîyêka girde vejîyaye meydan û tayê kesî cuya ra bîyî la hîna agahîyêka eşkera derheqê merde û birîndaran de çin a.
Îsraîl de vengê sîrenan berz bî û şar ame hişyarkerdene ke nêzdîyê cayê emînî de bimanê. Warê asmênî demkî ame girewtene.
Îranî hêrişî sey binpaykerdiştê eşkera yê xoserîya xo nirxnaye, pergalê pawitişê asmênî aktîf kerd û vat ke heqê cewabê xo paweno.
Komelê nêteweyî venga her di hetan da ke pêkewtiş nêro zêdekerdene û nêbo şerêko herêmkî yo hîra. DYA û Ewropa vat ke nê bîyayîşan bi baldarî taqîb kenê û hişyar kerd ke no krîz şêno bazaranê enerjîye û hemsengîya emnîyetê herême ser o tesîr bikero.
Trûmp: Wextê azadîye ameyo
Serekê Amerîka Donald Trûmp ke hêrîşanê Îsraîlî yê vera Îranî ra dima seba şarê Îranî qisey kerd û va wextê azadîye ameyo. Trûmpî zî da zanayene ke “Operasyonanê Muhabereyê Girdî” dest pê kerdo. Trûmpî venga muhafizanê Îranî da û vat, “Ganî şima çekanê xo verdê, şima do muameleyo adîl bivînê û kes dest nêdano şima, Nêke şima do rastrast mergî reyde rî bi rî bimanê.”
Herême de hareketîye dewam kena.
