Şêrê mabênê Îsraîlî û Îranî roja didîne de dewam keno. Hêrişê vizêrî yê Îsraîlî de Rayberê Dînî yê rejîmê Îranî Elî Hamaney ame kiştene. Îranî vera hêrişanê Îsraîlî yê şewa bîne dest bi hêrişê fuzeyanê balîstîkan kerd.
Îsraîlî roja 28ê Sibate de vera rejîmê Îranî şer da destpêkerdene û bi tîyareyan hêrişê xeylî cayanê Îranî kerd. Vizêrî şan ra hem Serekê Dewleta Îsraîlî Benyamîn Netenyahuyî, hem zî Serekê DYA’yî Donald Turampî hêrişan de kiştişê Rayberê Dînî yê Îranî Elî Hamaney eşkera kerd hema nêamebî teyîdkerdene.
Rejîmê Îranî ewro şefeqde rew eşkera kerd ke Rayberê Dînî Ayetulah Elî Hamaney hêrişanê vizêrî de ameyo kiştene.
Reyna ame diyarkerdene ke hêrişande xeylî rayedarê rejîmê Îranî ameyê kiştene. Rejîmê Îranî dima kiştena nê rayedaranê xo 40 roje şînê netewî îlan kerd.
Resmê kiştena Hamaneyî ame vilakerdene
Resmê kiştena Elî Hamaney serê platformanê medya dîjîtale yenê parekerdene. Goreyê malpera Israel News Pulse resmê kiştena Hamanêya ke mîyanê molozan de asena ame parekerdene. Malpere îdia kerd ke keso ke resmî de ameyo kiştene Elî Hamaney o.
Wezîrê Pawitene Nazirzahed ame kiştene
Wezîrê Pawitene yê Îranî Amir Azîz Nasirzadeh zî ame kiştene. Nazirzahed verê nê karî Serfermandarê Pêroyî yê Îranî bî û mîyanê rayedarîya molayan de wayîrê cayê de muhim bî.
Serfermandarê Pêroyî Pakpour jî ameyo kiştene
Eynî wext de Fermandarê Pêroyî yê Sepahê Pasdaran (IRGC) General Mohammad Pakpour zî hêrişan de ame kiştene. Pakpour dima rayedaranê eskerî yê Îranî yê ke şerê 12 Rojan de hêrişanê Îsraîlî de amebî kiştene amebî serê nê karî.
Şêwirmendê rejîmî Şamxanî zî ame kiştene
Reyna ame zanitene ke şêwirmendê rejîmî Alî Şamxanî jî weşîya xo nê hêrişan de kerda vindî.
Keyeyê Hamaneyî ra zî kesî merdê
Goreyê çimekanîyanê Îranî û daneyanê çapemenîya dinya endamê keyeyê Hamaneyî zî nê hêrişan de cuya xo kerda vindî. La belê çend kesê û nameyê înan çiko nêyame eşkerakerdene.
Îranî Hewlêr û Doha de da usanê eskerî yê DYA’yî ra
Şerê Îran û Îsraîlî dewam keno. Şewa bîne Îsraîlî xeylî şaristananê Îranî de 30î ra zêdeyêrî hêrişê hewayî kerdî. Îranî zî no serê şodirî sey verpers dayene usê eskerî yê DYA’yî yê ke Hewlêr, Qeter û Yewîya Emirtîya Ereb hedef girewt. Peynîya nê hêrişande tayê fuzeyan îsabetê usanê eskerî kerd û zerarêko cidî yo madî vejîya orte. Nê hêrişan de çiqas mordemî merdê an birîndar bîyê nîyame zanitene. DYA’yî hewtê nayera ver nê usê xo hişyar kerd bî û zafêrî zî tal kerd bî.
Hêrişê Îsraîl û DYA’yî yê ke vera Îranî desk kerdo ci dewam kenê. Heto bîn ra hêrişê Îranî yê ke bi fuzeyanê balîstîkan vera usanê DYA’yî yê Rojhilatê mîyanênî zî dewam kenê.
