Şero ke Amerîka û Îsraîlî 28ê sibate de da destpêkerdene roja xo ya hewtine de dewam keno. Şewe de bi taybetî Tehran û Beyrûtî de teqayîşê şîdetinî bîyî.
Trump: Serekê Amerîka Trumpî îfade kerd ke operasyonê erdî yê Îranî ser o beno “vindîkerdişê wextî”. NBC Newsî rê qisey kerd û vat: “Îranî komkeştîya xo vindî kerde, çi ke şênê vindî bikerê, vindî kerd.”
Wezîrê Teberî yê Îranî Arakçiyî verê naye zî vatbî ke eke Amerîka operasyonê erdî dest pêbikero “netîceyê ci beno felaket” û Îran seba her senaryoyî amade yo.
Beyrût: Artêşa Îsraîlî şewe taxanê başûrê Beyrûtî ser o 26 hêrişê hewayî kerdî merkezê fermandarîye û depoyê teyarayanê bêpîlotan ê Hizbullahî hedef girewtî.
Tehran: Televîzyona dewlete ya Îranî IRIB rapor kerd ke badê hêrişanê giranan ê Îsraîlî rojhelat û rojawanê Tehranî de zaf teqayîşî bîyî.
Pêkewtişî herême ra vila bena:
Hizbullahî veng da ke şarê ke 5 kîlometre dûrîyê sinorê Îsraîlî de yê, waran veng bikero.
Bahreynî vat ke hêrişanê Îranî de otêlêk û di awanîyan zerar dî.
Amerîka vat ke operasyonê ke bi Îsraîlî reyde benê, tede 30 ra vêşêr keştîyê Îranî binawe kerdî.
Erebîstana Suudî hîrê fuze û yew teyaraya bêpîlote ke ver bi Bingeyê Hewayî yê Prens Sultanî ameyêne eşt war.
Qetarî zî hêrişê dronî ke bingeyêkê amerîka hedef girewtbî, asteng kerd.
Yemen de Husîyê ke Îran paştî dano înan, vat ke “her wext seba hêrişî amade yê.”
Macron:”Fransa parçeyê nê şerî nîya û nêbena.”
Hêrişê mektebê Îranî: Fermandarê leşkerî yê amerîkayijan eşkera kerd ke hêrişê ke başûrê Îranî bajarê Minabî de mektebê kênekan ser o ame kerdene û zaf wendekarî merdê, şêno bibo ke hêzanê amerîkayî kerdo la cipersayîş hîna temam nêbîyo. Fermandarê Îranî vanê ke 150 wendekarî merdê la na hûmare hetê çimeyan bêhetan ra nêame rastkerdene.
