Endamanê Heyetê Îmralîyî ra Pervîn Buldan JIN TV’yî de programêk de îfade kerd ke Rayberê Şarê Kurdî Abdullah Ocalan bi munasebetê 8ê adare beyannameyêk hazir kerdo ke sey xerîtaya rayîrî do mîtînganê 8ê adare de bêro wendene.
Endama Heyetê Îmralîyî Pervîn Buldan JIN TV’yî de beşdarê programêkê taybetî bîye û fîade kerd ke Rayberê Şarê Kurdî Abdullah Ocalanî bi munasebetê 8ê adare beyannameyêk hazir kerdo û no beyanname do mîtînganê 8ê adare de bêro wendene.
Buldane vat: “Ma sey heyetî di wezîranê neweyan reyde ke ameyî têhet; Wezîrê Karê Mîyanê Welatî û Wezîrê Edaletî. Wezîrê Edaletî reyde qanûnê ke do bivejîyê ser o qisey kerd û ma fehm kerd ke amadekerdişê înan est ê, yê ma zî est ê. Ma qerar girewt ke verê ke komîsyon bêro têhet, ma bêrê têhet û îstîşare bikerê. Badê roşanî ma do bêrê têhet û verê komîsyonî amadekerdişî bêrê îstîşarekerdene. Ey zî vat ke makul o. Badê roşanî no qanûn do şêro komîsyon, komîsyonî de raporêk do bêro amadekerdene. Ma texmîn kenê ke Komîsyonê Edaletî ra ke bêro û peynîya nîsane, destpêkê gulane de bireso Meclîsê Pêroyî.”
“Wezîrê Karê Mîyanê Welatî reyde ma meseleya qayuman qisey kerd. Ma waştişê xo yê apeyantişê qayyuman û apeyşîyayîşê îradeyê înan ra vat. Helbet no qeraro ke tena wezîrêk bido nîyo, qerarê îradeyê sîyasî yo. Ma berpirsîyarî û karê înan ard vîrê înan.”
“Kombîyayîşê xo yê peyênî yê Birêz Ocalanî reyde 16ê sibate de ma kerd. Ê kombîyayîşî de ma waşt ke fîkrê ci yê derheqê 8ê adare de bigîrê la ey vat ke mîyanê amadekerdişêko hîna hîra de yo, beyannameyêk amade keno, sey xerîtaya rayîrî beyannameyê cinîyan amade keno. Vat ke 8ê adare ra ver do biresno. Ma vindenê ke di rojan badê nê beyanname do bireso destê ma ke mîtîngan de bêro wendene. Ma zanê ke Birêz Ocalanî meseleyê cinîyan ser o zaf întansîf kar keno. Têkoşînê seypêyîye û azadîya cinîyan, vera serdestîya vera cinîyan, vera kiştişê cinîyan ganî senî tepşêk bibo, nê kombîyayîşan de fîkr û pêşnîyazê ci est bîyî. Ma pawenê ke no beyanname seba nê 8ê adare sey xerîtaya rayîrî bibo. Hema senî ke bikewo destê ma mîtîngan de, meydanan de ma do nê mesajî biwanê. Birêz Ocalanî 8ê adare heme cinîyan ê dinya rê pîroz kerd.”
