Dimayê eşkerakerdişê deklarasyonê Newroza 2026î qiseykerdişî ameyê kerdene û qiseykerdişan de ame dîyarkerdene ke wa Newroza 2026î biba Newroza azadîye û yewîya kurdan û vengdayîşê nê ruhî reyde wayîrvejîyayîşê Newroze ame kerdene.
Roşanê Newroza 2026î ke bi sloganê, “Newroza Azadîye û Yewîya Demokratîke” do bêra pîrozkerdene. Koordînasyonê Merkezî yê Newroze ewro Amed de Sumerpark de bi kombîyayîşê çapemenî deklarasyonê Newroza 2026î eşkera kerd. Hemserekê Pêroyî yê DEM Partî Tuncer Bakirhan, Hemsereka Pêroyî ya DBP’yî Çîgdem Kiliçgun Uçar, aktîvîsta Têgêrayîşê Cinîyanê Azadan (TJA) Fatma Albay, Hemverfekê Înîsîyatîfê Yewîya Dmeokratîke Mehmet Kamaç, endamê Meclîsê Ciwanan, temsîlkarê partî û rêxistinanê sîvîl ê komelkî zî tede xeylê welatijî kombîyayîşê eşkerakerdişê deklarasyonî bîyê. Dimayê eşkerakerdişê deklarasyonî sîyasetmedaran qisey kerd.
Hemsereka Pêroyî ya DBP’yî Çîgdem Kiliçgun Uçar qiseykerdişê xo de bale ant vengdayîşê Aştî û Komelê Demokratîkî ser o û dîyar kerd ke no vengdayîş ma nêzdîyê azadîya ma, azadîya Rayberê Şarê Kurdî Abdullah Ocalanî kerd û dîyar kerd ke statuyê ziwanê ma, statuyê Kurdîstanî, statuyê şarê kurdî, statuyê kurdan waştişê şarê kurdî yo bingeyin o û wina vat: “Newrozo ke amo xêr amo, hewtemalo ke amo xêr amo. Zereyê jû serre de her çî zaf lez bî. Nika no demo newe ma ra vano ke ‘Şima heta nika tekoşîna xo pêrodayîşê xo çutur ard nê demî nayera dima zî henî bigê destê xo. Ça henî vano? Şima zanenê qerarê polîtîkaya înkar û asîmîlasyonî yê serê kurdan na dewlete seserre nayera ver meclîs de girewt bî. Ewro ma kamcî rewşede rê? Bi îrade û vengdayîşê birêz Abdullah Ocalanî ra dima meclîsî persa Kurdan kerde vernîya xo. Vanîme ke ma kurdan ebi feraset û zanayîşê xo, ebi pêrodayîş û xoverdayîşê xo nê polîtîkayê înkar û asîmîlasyonî orte ra vaznayî ra. Dewlete kewte raya muzakerayan. No kî çîyê de şenik nîyo.
Mîyanê şarî de zaf yeno qiseykerdene, vanê ‘ma zaf çî vat, zaf çî kerd ama hetê dewlete ra gamî nêameyî eştene.’ Ama bêro zanitene ke na mesele eke meclîs de yena qiseykerdene, na mesele eke kewta rojevê pêro partîyanê sîyasîyan û sero yeno vindertene kî çîyê de şenik nîyo.
Çîyê xo şenik o? Pêt nîyê. Meclîs û partîyê sîyasî pêt nîyê. Dormeyê mesele de fetelînê û anê nahet, benê ahet. Naye kam eşkeno bivurno? Ma vurnenîme. Ma kamî me? Şarî me, komelî me. Eke ma pêrodayîşê xo û xoverdayîşê xo cameverda îyî me. Yanê ma kî şenik nîyîme.
Nika wexto ke serê Rojavayî de hêriş bî, her ca de, çar leteyê Kurdîstanî û her cayê dinya de mordemê ma vejîyayî teber û xover da. Kesî nêva ke ez endamê na partîya, kesî nêvat ke fikrê mi noyo. Çike zanitêne ke Rojava gina war ro pêro pîyayê çar leteyan kî gineno war ro. Uca de sebî? Rojava bî sembol. Sembolê çi? Bi sembolê yewîye û demokrasî.
Rojava de jû sembolo bîn vejîya o jî gilangê yanê kezîyê Denîz Çîyaye bî. DAIŞ, HTŞ kam ke vera mordemîye bî înan vat ke, ‘ma na dinya cinîyan û Kurdan rê tarî kenîme.’ Ama ê gilangî înanrê henî bî derd ke na dinya de her ca de cinîyan gilangê xo munitî û kerdî sembolê xoverdayîşî. Ma nê di sembolan xo vîrîra mekeme. Çike mesajê nê di sembolan hem yewiya şarê Kurdî ya demokratîke, hem kî înşakerdena amayoxa şarê ma bî. Ma xo vîrîra mekeme.
Nika Rojhelato Mîyanên de jû şer est o û şerê de neheq o. Îran dewleta zulmîya yê îdamkerdena şaran û cinîyana. Îsraîl û Amerîka se kenê? Ey zî seba şeveknayişê xo vanê ma her çî kenîme. Her kesî kişenîme, qirkerdiş cî kenîme. Her di hetî kî neheq ê.
Îran de îradeyê şarê Kurdî û şarê bînê ke Îran de ciwiyenê demokrasî, têduştî û azadî, cuya hempar wazenê. Ma hetê înanderîme. Hetê îradeyê şaranderîme. Vengdayîşê 27ê Gucige ra heta nika yanê prosesê Aştî û Komela Demokratik qaytê dest û çimanê ma keno. No proses prosesêko girano ma naye zanîme. Ama ma naye kî zanîme ma zaf nêzdî kerd azadîye ra. Azadîya ziwanê xo ra. Azadîya cinîyan ra. Ma zaf nêzdî kerd azadîya birêz Ocalanî ra.
Vanîme ke no newroz newrozê azadîye û yewîye bo. Newrozê demokrasî bo. Vengdayîşê ma o yo. Statuya ziwanê ma, statuya Kurdîstan, statuya îtîqatê ma, her çîyê ma. Şarê kurd statuyê xo wazeno. Şarê kurd statuyê serekîya xo wazeno.
Nika ra Newrozê ma Hewtemalê ma bimbarek bo. Ma rê azadî û têduştîye bîyaro.”
