Hemseraka Pêroyî ya DBP’yî Çîgdem Kiliçgun Uçare Konferansê Înîsîyatîfê Yekîtîya Demokratîk de bine xêz kerd ke heta Kurdî mîyanê xo de huqûqêko demokratik awan nêkerê, nêeşkenê dewlete de niqaşêko xurt bidê ramitene. Beşdarê bînanê ke konferansî de qisey kerd ey zî yewîya kurdan ser vindertî.
Hemsereka Pêroyî yê Partîya Herêmanê Demokratîk (DBP) Çîgdem Kiliçgun Uçar, Halîm Îpek, Ohannas Gafur Ohannian û Doktor Xelîl beşdarê Konferansê Înîsîyatîfê Yewîya Demokratîk a ke bi dirûşma “Kurdên Bakur yekîtiya xwe ya neteweyî nîqaş dikin” yenakerdene bî. Uçare û qiseykerdoxanê bînanê ke konferans de qisey kerd, serê muhimîya yewîya netewe yê Kurdan erjnayîşê kurî kerdî.
‘Ziwanê ma rûmetê ma yo’
Hemseraka DBP’yî Çigdem Kiliçgun Ucare qiseykerdişê xo bi ziwanê dayîka xo Kirmanckî kerd. Uçarê sereyê qiseykerdişê xo de bale ante serê ziwanê Kurdî û wina vat: “Ma dêndarê Tevgera Azadîya Kurdanê ke ewro ma pê ziwanê xo eşkenê qisey bikime. Dewlete û îktîdaran ziwanê ma kerd bî binê here la xoverdayîşê ma û Tevgera Azadîye ma ziwanê xo vet werte. Wexto ke ma tirkî qisey kenê ma xo kemî vênenê. No ziwan ganî weşîya xo biramo.”
‘Yewîye eke demokratik nêbo, serkewtene zî nêbena’
Uçare diyar kerd ke pîya tekoşîn nêkerdene verê yewîye û pawitena kurdan de astengîye virazena û wina dewam kerd: “Ganî yewîye heme hetan ra akerde bo û verane bikero. Eke yewîye demokratîk nêbo, serkewtene zî nêbena. Rayberê Şarê Kurd Abdullah Ocalanî 27ê Sibate de vengdayîşêk kerd û vat; ‘Ma çîyêko gird girewt xo dest. Endî kes nêeşkeno vajo Kurdî û ziwanê Kurdan çin o. Ma înkar werte ra vazna ra û endî raya ma raya azadîye û demokrasîya.’ Heta ke şaro Kurd binê zextê dewlete de azad nêbo, şarê bînî zî, bawerîyê bînî zî azad nêbenê. Ne pêro pîya girêdayeyê yewbinîyê.”
‘Seba ma huqûqo mîyanên ê yêwîye hewceyo’
Uçare bale ante serê şer o taybet ê dewlete yo ke Vakurê Kurdîstanî de vera kurdan raya asîmalasyon û înkarkerdene yeno ramitene devam keno. Vera nê polîtîkayan zî serkewtene destê Kurdan û huqûqê mîyanê Kurdan de ro û wina vat: “Dewlete hîna zî nasnameya ma nas nêkena. Ma mîyanê huqûqê dewlete de çin ê û çoka ma hîna yenîme girewtene û herdê xo ra yenîme vetene. Bê huqûqê dewlete yew huqûq o bîn ma rê lazim o. No huqûq zî ganî huqûqê mîyanê Kurdan bi xo bo. Eke ma mabênê xo de huqûqêko demokratîk awan nêkime ma nêeşkenîme şime dewlete de mineqeşeyî huqûqê demokratîkî bikime. Ganî ma pîya bime ke destê ma vera dewlete xurt bibo.”
‘Rojava seba ma dersêka gird a’
Uçare numûneya xoverdayîşê Rojavayî nîşan dê û qiseykerdişê xo wina domna: “Ma yewîya demokratîke wexto ke hêrişê Rojavayî bî ma w wext dîye. Her hetê dinya de şarê kurd û rêxistinê kurdan bî yew. Kesî nêva fikrê mi no yo ez aye ra paştî nêdana Rojava. Heme herkesî pawitena Rojavayî de cayê xo girewt. Rojavayî mesajêk da ma; Ganî yewîya kurdan naye ra dima xurt bibo. Heke ma nêbime yew, kayê serê ma hercû şonê zêde benê.”
‘Rêberiya vê têkoşînê Birêz Ocalan dike’
Uçare wina dewam kerd: “Ma serê nê erdan de her çî dî, ma teyna azadîye nêdîye. Nika Rayberê Şarê Kurd û Tevgera Azadîye ma rê rayberîye kenê. Kesê ke na paradîgmaye qebul kenê pêroyê înan rayberîya tekoşîne kenê. Bi felsefeya ‘Jin, Jîyan, Azadî’ ma demokrasî û aştîye awan kenîme.”
‘Yewîye nêbo qirkerdiş reyna beno’
Dima qiseykerdişê Uçare ra beştaranê bînan zî fikrê xo pare kerd. Halîm Îpekî da zanayene ke Peymana Qesrî Şîrîn ra natêrî yo ke persa yewîya kurdan sereke ya û wina vat: “Yewîye mîyanê şarê Kurdî de est a û şar naye her wext nîşan dano. La partîyê sîyasî yê Kurdî nênê hetê yewbinî. Ganî partîyê sîyasî xo mesûl bîvênê.”
Ohannas Gafur Ohannianî zî bale ante serê Qirkedişê Ermenan û wina vat: “Milyonek û nêm Ermenî serê nê herdan de ameyî qetilkerdene, dest ci eştene û koçkerdene. No şaro qedîm ewro vera qediyayene şino. Ez bi rêzdarîye înan ana vîra xo û sereyê xo verê înan de nana ro. Eke yewîya demokratîke nêro viraştene, dewletî reyna ma bi yewbinî bidê qirkerdene.”
Doktor Xelîlî zî serkextene û astengîyan xêz kerd û wina vat: Seba ma çiqas serkewtene nêzdî bena handê zî astengî kewenê vêrnîya ma. Serê nê herdan de zaf qirkerdişî ameyî kerdene. Nînan ra yew zî Qirkerdişê Ermenîyan bî. Eke ma yewîye mîyanê xo de nêvirazim reyna bi milyonan însanî bêrê qirkerdene. Her kes duşê xo ra xizmeda yewîye bikero ke ma vera azadîye şime.”
Dima nîşandayena sînevîzyonî, konferans çapemenîyê re girewte dewam keno.
