Hemwelatîyanê Ebexî dîyar kerd ke Newroze seba şarê kurdî sembolê estbîyayîş, azadîye û serewedartişî ya û vat: “Bila Newroza emserî biba mizgînîya azadîya girewteyanê sîyasî û wesîleyê awankerdişê aştîyêka domdare.”
Newroza Vakurê Kurdîstanî de verê her çîyî mizgînîya vejîyayîşê xozayî ya û roşanê kulturî ya ke bi hezar serranê est a ke kokê xo mîyanê komelî de verdayo. Emser bi sloganê “Newroza Azadîye û Yewîya Demokratîke” ameye pîrozkerdene. Qezaya Ebexî ya Wanî ra zî adirê Newroze vîyart.
Ahmet Sayinelî bale ante muhîmîya Newroze ser o û vat: “Serran ra pey Newroze ameye qedexekerdene, la nika ma Newroza xo bi keyfweşî pîroz kenê. Sebebê na azadîye zî Rayberê Şarê Kurdî Abdullah Ocalan o. Wa Newroze biba wesîleyê azadîya girewteyanê zindanan û wesîleyê aştîyêka domdare.”
Nesîm Yildîzerî vat ke Newroze seba ci yena manayê serewedartiş, aştî û bawerîya şarê kurdî û vat: “Embazê ma zîndanan de seba Newroze canê xo dayî adirî, bîyî sembolê kurdan. Eke Newroze nêba, ma zî çin ê. Newroze qederê şarê kurdî ya. Wa Newroza 2026î biba wesîleyê aştî û waştişê ma bêrê caardene. Ma ziwan û heqê xo wazenê; ma do bi xoverdayîşê xo serkewê.”
Ozcan Topkaçîyî vat: “Newroze sembolê tewr gird ê azadîye ya. Ma hêvîdar ê ke Newroza emserrî biba mizgînîya aştî, waûbirayî û azadîye; biba wesîleyê azadkerdişê heme girewteyanê sîyasî û Rayberê Şarê Kurdî Abdullah Ocalanî. Wa adirê Newroze rayîrê aştîyêka domdare roşn bikero.”
