Îdir de bi sloganê “Newroza Azadîye û Yewîya Demokratîke” pîrozbayîyêka biheybet ameye kerdene. Hemwelatîyanê Îdirî dîyar kerd ke o adiro ke bedenê Zekîye Alkan û Rahşan Demîrelan ra resayo ewro, do xurtkerdişê têkoşînî reyde hîna girr bibo.
Şaristanê Îdirî de bi sloganê “Newroza Azadîye û Yewîya Demokratîke” pîrozbayîyêka biheybet ameye kerdene. Rixmê varanî zî, bi hezaran cinî, ciwan û extîyarî bi kincanê xo yê neteweyî û bi renganê kesk û sûr û zerd herikîyayê qadê Newroze. Rixmê astengîyanê polîsan ê reng û flamayanê neteweyî ser o zî, şar bi coşêko pîl govende girewte.
Hemwelatîyê Îdirî ke ajansê ma rê qisey kerd, bale ant heqê hêvî ser o û waştişê azadîya fîzîkî ya Rayberê Şarê Kurdî Abdullah Ocalanî kerd.
Hemwelatîyan muhîmîya tarîxî ya Newroze îfade kerd û dîyar kerd ke ê herinda Kawayê Asinkar û şehîdanê Newroze ser o yê. Hemwelatîyan wşna vat: “No adiro ke Kawayê Asinkarî wekerdo, ewro bi bedenê embazanê sey Zekîye Alkan, Rahşan Demîrelan resayo ma. Ma ewro tîya de yê ke nê adirî hîna xurt bikerê. Waştişo ma yo sereke azadîya fîzîkî ya Rayber Apo ya. Heta ke Serekê ma azad nêbo, ma zî azad nêbenê.”
Vengdayîşê yewîye û azadîya girewteyan
Hemwelatîyan bale ant yewîya her çar hetanê Kurdîstanî û dîyar kerd ke Newroze seba şarê kurdî wayîrê rûmetêko gird o. Hemwelatîyan vengdayîşê azadîya girewteyanê sîyasî kerd û nê çîyî vat: “Ma na Newroze seba pawitişê şarê kurdî û azadîya Kurdîstanî pîroz kenê. Hêvîya ma a ya ke Newroze biba wesîleyê azadîya girewteyanê sîyasî. Ma zî sey cinî, seba aştîyêka birûmete û serkewtişî do her tim rêza ewilin de bibê.”
Hemwelatîyanê cinî ke bi kincanê xo yê neteweyî qadî xemelnaye, dîyar kerd ke ê do heta peynî peyê heqanê xo de bibê û vat: “Ma aştî wazenê la ma do tim seba serkewtişî xover bidê.”
