Hemserekê Pêroyî yê DBP’yî Keskîn Bayindirî bale ante Prosesê Haştîye û Komelê Demokratîkî ser û dîyar kerd ke proses qonaxêka muhîme de yo û vat: “Na qonaxe qonaxa azadîya Birêz Ocalanî û azadîya şarê kurdî ya.”
Qezaya Geverî ya Colemêrgî de bi şîarê “Newroza Azadî û Yewîya Demokratîke” warê futbolî de pîrozkerdişê ame organîzekerdene. Hemserekê Pêroyî yê DBP’yî Keskîn Bayindir û Parlamentera DEM Partî ya Colemêrgî Oznure Bartin, temsîlkarê partîyanê sîyasîyan û rêxistinê komelê sîvîlî û dayîkê haştîye, bi des hezaran hemwelatî beşdarê pîrozkerdişî bîyî. Hemwelatîyê Geverî bi cil û berganê neteweyîyan û rengê kesk, zerd û sûrî ameyî warê Newrozî. Warî ra coş û heyecanêko gird bî û sloganê “Bijî Serok Apo”, “Jin, jiyan, azadî” û “Bê Serok jiyan nabe” bi domdarî ameyî vatene. Şarê Geverî waştişê xo yê seba ziwanê kurdî û kulturê kurdî bi pankartê “Wa ziwanê kurdî bibo ziwano fermî û yê perwerdeyî” warê Newrozî ra ard ziwan.
Posterê Ocalanî ameyî akerdene
Pîrozkerdişî de ciwananê Geverî fotografê Rayberê Şarê Kurdî Abdullah Ocalanî berz kerdî. Pîrozkerdişî seba şehîdanê ke têkoşînê azadî û demokrasî de cuya xo daya, deqayêk bi rêzgirewtişî dest pêkerd. Hemserekê Qezaya Geverî yê DEM Partî Abdullah Kirmizigulî qisey kerd û Newroza Şarî pîroz kerd. Abdullah Kirmizigulî da zanayene ke Newroze roja serewedartiş û xoverdayîşî ya û wina vat: “Ma zî Kawayê Asinkar ra heta Kawayê Hemdemî Mazlum Doganî Newroza heme şehîdanê Newroze pîroz kenê û sereyê xo vera têkoşînê înan de ronanê.”
‘Şarê kurdî çar hetanê Kurdîstanî de yew o’
Oznure Bartin Newroza 2026î ya heme şar û Rayberê Şarê Kurdî Abdullah Ocalanî pîroz kerd û wina vat: “Hêzê hegemonîkî wazenê ke şarê kurdî bêstatu û bênasname bimano û ma na rewşe tewr peynî Rojawan de dîye. La şarê kurdî bi yewîya xo cewab da nê hêzan. Şarê Rojawanî bi Paradîgmaya Birêz Ocalanî xover da û serkewt. Şarê kurdî çar hetanê Kurdîstanî de yew o. Ma do bi nasnameyê xo, kulturê xo û ziwanê xo wayîrê mîrasê şehîdan bivejîyê. Heta azadîya fîzîkî ya Rayberê Şarê Kurdî Birêz Abdullah Ocalanî bêro temînkerdene ma do têkoşînê xo dewam bikerê.”
‘Dem demê azadîya Birêz Ocalanî yo’
Keskîn Bayindirî zî Newroza şarî pîroz kerd û vat ke Newroza 2026î qada xoverdayîşê Geverî de Rayberê Şarê Kurdî pîroz keno. Bayindirî Newroza çar hetanê Kurdîstanî pîroz kerd û wina dewam kerd: “Ma ameyî qonaxêka muhîme û na qonaxe qonaxa azadîya Rayberê Şarê Kurdî Birêz Ocalanî ya. Wazenê ke pîrozkerdişê Newroze asteng bikerê, vera astengan Zekîyeyan bi bedenê xo adirê Newroze veşna, şima nêşenê Newroze asteng bikerê.”
‘Şarê Rojhelatî do ser bikewo’
Bayindirî bale ante şerê Îranî ser û nê çîyî vatî: “Şarê Îranî bi serran binê zilm û zordarîye de yê. Nika zî vera Rejîmê Dardekerdoxî mîyanê têkoşînêkê de yê. Ma bawer kenê ke şarê Rojhelatî bi Paradîgmaya Birêz Ocalanî xover dano û ser keweno. Kes nêeşkeno vernîya têkoşînê ma bigîro. Şarê kurdî êdî bêstatuyîye qebûl nêkeno. Çunke Rayberê ma est o, fikr û felsefeyê ey est ê. Kurdî do heta ke azad bibê xover bidê.”
Peyê vatişan dayîkanê haştîye adirê Newroze veşna û şar dormeyê adirî de govende girewte. Dima hunermend Sîpan Xelat û Senar Renda bi kilamanê şarî rê wextêko weş da vîyarnayene.
