Siba Roşanê Remezanî yo. Seba roşanî welatîyê ke Amed de ciwîyenê verê xo da sûk û bazaran. Welatîyan dîyar kerd ke rîyê krîzê aborî ra nêeşkenê sey verî lazimtîyanê xo yê roşanî biherînê û vat: “Êdî ma nêeşkenê bi zerrîya xo çîyêk biherînê.”
Amed de seba Roşanê Remezanî têgêrayîşêko vêş sûk û bazaran de est o. Labelê no têgêrayîş rîyê krîzê aborî yo vêşî ra û vaybîyayîşê lazimtîyan, keyfweşî ra vêşer cayê xo fikar û xemgînîyî rê verda. Hemwelatîyê ke seba herînayîşê lazimtîyanê roşanî vejeyê sûk û bazaran, bale ant vêşbîyayîşê enflasyonî ser o û dîyar kerd ke rîyê giranîye ra nêeşkenê çîyêk biherînê.
‘Ma goreyê zerrîya xo nê, goreyê tûnika xo herînenê’
Hemwelatîyê Amedî dîyar kerd ke nêeşkenê çîyanê bi zerrîya xo biherînê û îfade kerd ke ê bêçare yê ke goreyê aborîya xo têbigêrê. Cinîyê ke sûke de yê, ma înan rê mîkrofonê xo derg kerd û înan vat ke ê tena eşkenê lazimtîyanê tewr lezgîn û mecbûrî biherînê û wina domna: “Çi lazimtîyê keyeyî est bî, ma mecbûr ê tena înan biherînê. Ma û mêrdeyê xo vejîyenê sûle; ma werd û lazimtîyanê keyeyî herînenê. Qaso ke est o ma her çîyî eşkenê xo rê biherînê û eke qîmî nêkero zî ma îdare kenê. Êdî ma bi zerrîya xo nêeşkenê çîyêk biherînê.”
‘Heme çî zerrîya ma de mend’
Welatîyan bale ant vaybîyayîşo zêde yê bazaran û nerazîbîyayîşê xo yê vera krîzê aborî ser o û wina qisey kerd: “Heme çî vay o. Ma tena gedeyanê xo rê cilê tewr erzanî herînayê. Verî ma çi biwaştêne, ma herînayêne. Ma cilê başî herînayêne û ma mesrefê keyeyê heme peyda kerdêne. La ma nika nêeşkenê. Heme çî zaf vay bîyo; merdim nêeşkeno çîyêko baş biherîno. Cehdeyî ser o merdim vîneno vano qey erzan ê. La demo ke merdim destê xo erzeno, vanê di, hîrê, panc hezar o û çîyêko baş zî nîyo. Heme çî wina vay bîyo ke kes nêeşkeno çîyêk biherîno.”
